। मुंबई । प्रतिनिधी ।
भारताच्या गानसम्राज्ञी लता मंगेशकर यांना कोरोनाची सौम्य लक्षणं जाणवत असल्याची धक्कादायक माहिती समोर येत आहे. मात्र, त्यांच्या वयाचा विचार करता त्यांना रुग्णालयात दाखल करण्यात आले आहे. लता मंगेशकर यांचे वय 92 वर्ष असल्याने खबरदारीचा उपाय म्हणून ब्रीच कँडी रुग्णालयात त्यांना दाखल करण्यात आल्याची माहिती त्यांच्या कुटुंबीयांकडून देण्यात आली आहे.
लता मंगेशकर यांचे नातेवाईक आणि कर्मचारी यांची कोरोना चाचणी करण्यात येणार आहे. लतादिदी यांचं स्थान सर्वांच्या ह्रदयात आहे. डॉक्टर त्यांची काळजी घेतील, असे महापौर किशोरी पेडणेकर यांनी सांगितले. लता मंगेशकर यांना श्‍वास घेण्यास त्रास झाल्याने याआधी नोव्हेंबर 2019 मध्ये रुग्णालयात दाखल करण्यात आले होते. त्यावेळी त्यांना व्हायरल इन्फेक्शन झाल्याचे उषा मंगेशकर यांनी सांगितले होते.
गानकोकीळा लता मंगेशकर यांनी वयाची 92 वर्ष पूर्ण केली आहेत. त्यांचा जन्म 28 सप्टेंबर 1929 रोजी झाला. लतादीदींना भारतरत्न या देशातील सर्वोच्च नागरी पुरस्काराने सन्मानित करण्यात आले आहे. याशिवाय त्या दादासाहेब फाळके पुरस्कार आणि फ्रान्सचा सर्वोच्च नागरी पुरस्कार ऑफिसर ऑफ द लीजन ऑफ ऑनर यासह अनेक राष्ट्रीय आणि आंतरराष्ट्रीय पुरस्कारांनी सन्मानित झाल्या आहेत. 1974 मध्ये, गिनीज बुक ऑफ वर्ल्ड रेकॉर्डने त्यांना इतिहासातील सर्वाधिक रेकॉर्डिंग केलेल्या कलाकार म्हणून स्थान दिले. त्यांनी 1948 ते 1974 या काळात 25,000 हून अधिक गाणी गायली आहेत.