| रोहा | विशेष प्रतिनिधी |
रायगड जिल्हा परिषद अध्यक्ष व उपाध्यक्ष पदाची निवडणूक गुरुवार पार पडली. यामध्ये रोहा तालुक्यातील भुवनेश्वर जिल्हा परिषद गटाचे विजयी उमेदवार मधुकर मारुती पाटील यांची जिल्हा परिषद उपाध्यक्षपदी बिनविरोध निवड झाल्याची घोषणा होताच रोहा शहर व तालुक्यात राष्ट्रवादी काँग्रेस पक्षाच्या कार्यकर्त्यांनी आणि मधुकर पाटील यांच्या चाहत्यांनी मोठा जल्लोष साजरा केला.
मधुकर पाटील यांनी गेल्या अनेक वर्षांपासून राष्ट्रवादी काँग्रेस पक्षात निष्ठेने काम करत संघटन मजबूत करण्यासाठी महत्त्वाची भूमिका बजावली आहे. पक्षाच्या तालुका अध्यक्ष, जिल्हा अध्यक्ष तसेच महाराष्ट्र प्रदेश उपाध्यक्ष अशा विविध जबाबदाऱ्या त्यांनी यशस्वीपणे सांभाळल्या आहेत. त्यांच्या वडिलांचा राजकीय वारसा पुढे नेत त्यांनी सातत्याने पक्षासाठी आणि जनतेसाठी काम केले आहे. या निवडीबद्दल खासदार सुनील तटकरे, मंत्री अदिती तटकरे तसेच माजी आमदार अनिकेत तटकरे राष्ट्रवादीचे सरचिटणीस विजयराव मोरे, तालुकाध्यक्ष विनोद पाशिलकर, माजी सभापती अनिल भगत, रोहा नगराध्यक्षा वनश्री शेडगे यांनी मधुकर पाटील यांचे अभिनंदन करत शुभेच्छा दिल्या.
उपाध्यक्षपदी मधुकर पाटील यांच्या निवडीने रोह्यात उत्साह
