माथेरानला आर्थिक मंदीचा फटका

शहरात पर्यटकांचा शुकशुकाट

। नेरळ । प्रतिनिधी ।

सध्या माथेरान हे थंड हवेचे ठिकाण मंदीच्या गर्तेत सापडले असून बाहेरचे वातावरण कडक उष्णतेमुळे तापले असताना थंड हवेचा आस्वाद घ्यायला पर्यटक फिरकत नसल्याचे चित्र आहे. अख्ख्या मार्च महिन्यात माथेरानमध्ये जेमतेम 34 हजार पर्यटक आले असून शनिवार रविवार वगळता पर्यटक येत नसल्याने येथील व्यवसायिक आर्थिक संकटात सापडले आहेत. दरम्यान, मंदीचा फटका माथेरानमधील पर्यटनस्थळी बसला असून, आता परीक्षांचा हंगाम संपल्याने माथेरानमधील पर्यटन व्यवसायाला सुगीचे दिवस येतील, अशी अपेक्षा व्यापारी वर्गाला आहे.

ब्रिटिशांनी वसवलेल्या माथेरान या पर्यटनस्थळी असलेली प्रचंड वनराईमुळे वातावरणात कायम थंडावा असतो. पावसाळ्यात पर्यटक हे धुक्याची दुलई अनुभवण्यासाठी, तर हिवाळ्यात गुलाबी थंडी अनुभवण्यासाठी येत असतात. मात्र सर्वाधिक पर्यटक हे फेब्रुवारीपासून जून महिन्याच्या पहिल्या आठवड्यापर्यंत आल्याची नोंद होते.

मार्च महिन्यात माथेरानमध्ये पर्यटन बचावाच्या नावाखाली माथेरान बंद ठेवण्यात आले होते. त्यावेळी दीड दिवसांच्या बंदचे चांगले-वाईट परिणाम येथील पर्यटन व्यवसायावर पडले. माथेरान बंद आहे का, अशी चौकशी माथेरानला येण्याआधी केली जात असल्याचे उघड झाले. त्यामुळे 18 मार्च आणि 19 मार्च रोजी केलेल्या माथेरान बंदचा थेट परिणाम येथील पर्यटनावर झाला आहे.

सध्या वातावरणात प्रचंड अशा असताना थंडगार वातावरण असलेल्या माथेरानमध्ये पर्यटक येत नसल्याने प्रचंड मंदी अनुभवली जात आहे. शनिवार, रविवारीदेखील तीन हजारापेक्षा अधिक पर्यटक माथेरानमध्ये आलेले नाहीत. संपूर्ण मार्च महिन्यात 34 हजार पर्यटक माथेरानमध्ये आले असून मार्च महिन्यात सलग सुट्ट्या असतानाही पर्यटकांची संख्या जेमतेम होती. लहान दुकानदारांपासून मोठे हॉटेल व्यवसायिकांना ग्राहक मिळेनासे झाले आहेत. त्यामुळे शुकशुकाट दिसून येत असल्याने माथेरानमध्ये कोरोना काळात झालेल्या लॉकडाऊनची आठवण होत असल्याची माहिती माथेरान नागरी पतसंस्थेचे संचालक व्यापारी गिरीश पवार यांनी दिली. या पर्यटन घटण्याचा फटका पर्यटनावर अवलंबून असलेल्या प्रत्येक घटकाला बसला आहे. नेरळ येथून माथेरान येणार्‍या मिनीट्रेनमध्ये मार्च महिन्यात जेमतेम 3,817 पर्यटकांनी प्रवास केला. तर रस्तेमार्गाने माथेरान शहरात 30,735 पर्यटक आले. या अल्प पर्यटकांचा फटका घाट रस्त्याने पर्यटकांना घेऊन येणार्‍या नेरळ माथेरान टॅक्सी चालक यांना झाला.