मिनीट्रेनची पावसाळी सुट्टी वाढली

पुन्हा एकदा मोडला आपला शिरस्ता; दिवाळी नंतरच थेट प्रवास सुरू होणार

| नेरळ | प्रतिनिधी |

ब्रिटिशकाळात सुरू झालेली नेरळ-माथेरान-नेरळ ही नॅरोगेज मार्गावर चालवली जाणारी मिनीट्रेन पावसाळी सुट्टी वाढली आहे. ब्रिटिश काळापासून 15 जून रोजी पावसाळी सुट्टीवर गेलेली मिनीट्रेन दरवर्षी 16 ऑक्टोबर रोजी सुरू होत होती. मात्र, नॅरोगेज मार्गावर अभियांत्रिकी कामे सुरू असल्याने यावर्षीदेखील पावसाळी सुट्टीनंतर नेरळ-माथेरान-नेरळ अशी प्रवासी वाहतूक सुरू झालेली नाही. दरम्यान, मिनीट्रेनची वाहतूक सुरू झालेली नसल्याने पर्यटकांचा हिरमोड झाला असून, दिवाळी सणानंतर नेरळ-माथेरान-नेरळ मार्गावर मिनीट्रेन सुरू होणार आहे.

ब्रिटिशकाळात 1909 मध्ये सर आदमजी पीरभोय यांनी नेरळ-माथेरान या 21 किलोमीटर लांबीचा मिनीट्रेन मार्गाचा शोध लावला. पुढे मध्य रेल्वेचे ताब्यात हा रेल्वे मार्ग देण्यात आला आणि त्यानंतर मध्य रेल्वेचे माध्यमातून नेरळ-माथेरान-नेरळ नॅरोगेज मार्गावर मिनीट्रेन सुरू झाली. ही मिनीट्रेन ब्रिटिश काळापासून पावसाळ्यात दरडी आणि माती कोसळण्याचा धोका लक्षात घेऊन बंद ठेवली जाते. ब्रिटिश काळापासून हा शिरस्ता कायम असून, नेरळ माथेरान नेरळ मिनीट्रेन 15 जूनपासून 15 ऑक्टोबरपर्यंत पावसाळी सुट्टी आणि नॅरोगेज मार्गावर दुरुस्तीची कामे करण्यासाठी बंद ठेवली जाते. मात्र, चार महिन्यांनी सुरू होणारी मिनीट्रेन 16 ऑक्टोबर रोजी पुन्हा नॅरोगेज मार्गावर येत असल्याने पर्यटक आणि प्रवासी यांच्यासोबत माथेरानमधील हॉटेल व्यावसायिक यांच्यात आनंदाचे वातावरण असते.

माथेरान राणी म्हणून ओळखली जाणारी मिनीट्रेन आणि माथेरानमधील पर्यटन व्यवसाय हे समीकरण झाल्याने माथेरानमधील पर्यटन व्यवसायाला मिनीट्रेन सुरू झाल्यानंतर सुगीचे दिवस येतात. मात्र, मागील काही वर्षात मिनीट्रेनचा पावसाळी हंगाम लांबत चालला आहे.तर, 15 जून ही बंद होण्याची तारीखदेखील दरवर्षी बदलली जात आहे. यावर्षी तर 25 मेपासूनच मिनीट्रेनचा पर्यटन हंगाम बंद करावा लागला होता. गतवर्षी 22 ऑक्टोबर रोजी म्हणजे नेहमीच्या शिरस्त्यानुसार आठ दिवस उशिरा मिनीट्रेन नेरळ-माथेरान-नेरळ मार्गावर चालण्यास सुरुवात झाली होती. यावर्षी पाऊस लांबला असल्याने मिनीट्रेनचा प्रवास आज नेहमीच्या तारखेला सुरू झालेला नाही. त्यात काही दिवसांनी दिवाळी सण सुरू होत असून, यावर्षीदेखील दिवाळीमध्ये मिनीट्रेनची सेवा सुरू झालेली नसेल, त्यामुळे पर्यटन व्यवसायावरदेखील परिणाम होण्याची शक्यता आहे. उन्हाळी पर्यटन हंगाम यावर्षी मे महिन्यात सुरू झालेल्या अवकाळी पावसाने वाहून नेला होता. परंतु, पावसाळ्यात तीन महिने प्रचंड प्रमाणात पर्यटकांची गर्दी माथेरानमध्ये पहायला मिळाली.

मिनीट्रेन पर्यटन हंगाम
16 ऑक्टोबर ते 15 जून असा असतो. मात्र, यावर्षी 25 मेपासून मिनीट्रेन नेरळ येथून सोडली गेली नाही. तर, यावर्षी मिनीट्रेन 16 ऑक्टोबरपासून सुरू झालेली नाही.