नायट्रीक अ‍ॅसिडची असुरक्षित वाहतूक
दोन ठिकाणी ट्रक पाण्याने धुण्याचा प्रयत्न
। पोलादपूर । प्रतिनिधी ।
तालुक्यातील नदीपात्रात तसेच कशेडी घाटात रासायनिक सांडपाणी ओतण्याच्या घटनांत वाढ झाली असताना पोलादपूर शहरापासून तीन कि.मी. अंतरावर एका ट्रकमधून असुरक्षितरित्या सुरू असलेल्या नायट्रीक अ‍ॅसिडच्या वाहतूकीदरम्यान एक ड्रममधून अ‍ॅसिडची गळती सुरू होऊन मुंबई गोवा राष्ट्रीय महामार्गावर पिवळया वाफांसह सर्वत्र खोकला आणि डोळयांची जळजळ होईल, अशी परिस्थिती निर्माण झाली. मात्र, दोन वेळा या गळक्या ड्रमवर पाण्याचा मारा करून ट्रक धुवून अ‍ॅसिड साफ करण्याचा यशस्वी प्रयत्न करीत हा ट्रक सुरक्षितरित्या मार्गस्थ झाला.
पोलादपूर शहरापासून काही अंतरावर लोहारे गावाच्या हद्दीत नायट्रीक अ‍ॅसिडचे लहान-मोठे बॅरल आणि ड्रम घेऊन एका ट्रकमधून असुरक्षितरित्या वाहतुक सुरू असताना अचानक ट्रकमधून राष्ट्रीय महामार्गाच्या नव्या काँक्रीटीकरणाच्या रस्त्यावरून अ‍ॅसिड गळती सुरू झाली. यामुळे हवेमध्ये पिवळया रंगाचे धुराचे लोट पसरू लागले आणि सायंकाळी करमणूक, फिटनेस तसेच आरोग्याच्या कारणावरून पायी चालणार्‍या लोकांना यामुळे खोकला आणि डोळयांची जळजळ सुरू झाली. यावेळी ट्रक ड्रायव्हरने वाहन चालवित प्रथम एका ढाब्याजवळ आणून थोडा पाण्याचा मारा केला. मात्र, या तुटपुंज्या पाण्याचा मार्‍यामुळे परिसरात पिवळया धुराचे प्रमाण वाढले आणि तेथून ट्रकड्रायव्हरला सर्व्हिस सेंटरमध्ये पाण्याचा मारा करण्यास सांगण्यात आले. यामुळे तीन कि. मी. अंतर रस्त्यावर अनेक ठिकाणी ड्रममधून गळणार्‍या नायट्रीक अ‍ॅसिडमुळे काँक्रीटच्या रस्त्यावरून तसेच चिखल मातीवरून वाफा येऊ लागल्या तसेच हा ट्रक पिवळया धुराच्या रेषा हवेत काढीत पोलादपूरनजिकच्या चरई फाटयाजवळील सर्व्हिस सेंटरमध्ये ट्रक आणून उभा करण्यात आला.
पोलादपूर तालुक्यात टँकरद्वारे सावित्री नदीपात्रात रासायनिक सांडपाणी सोडण्यात आल्याने मासे मरण्याची घटना आणि कशेडी घाटात टँकरमधून रासायनिक सांडपाणी डोंगरउतारावर सोडण्याची घटना तसेच अलिकडेच नदीच्या पाण्यावर पांढर्‍या ढगांसारखा फेस तरंगू लागल्याच्या घटनेनंतर रासायनिक पदार्थांच्या हाताळणीबाबतची बेपर्वाई तालुक्याच्या नैसर्गिक आरोग्याला व जनजीवनाला हानीकारक ठरू शकणार आहे. त्यामुळे हा टँकर असुरक्षितरित्या नायट्रीक अ‍ॅसिडची वाहतूक करीत असतानाही सुरक्षितरित्या मार्गस्थ झाल्याने आश्‍चर्य व्यक्त होत आहे.
