आमदार गोगावलेंना पुन्हा खुणावतय मंत्रीपद

खराब कामगीरी करणार्‍यांचा पत्ता कट होणार

| रायगड | खास प्रतिनिधी |

महाराष्ट्रातील मंत्रीमंडळ विस्ताराच्या हालचालींना वेग येत असल्याचे दिसून येते. मंत्रीमंडळात महायुतीमधील आमदारांना सामावून न घेतल्याने त्यांच्यामध्ये असंतोष खदखदत आहे. त्यामुळे त्यांना शांत करुनच विधानसभेच्या निवडणुकीला सामोरे जाण्याची तयारी राज्यातील सरकारने केल्याचे बोलले जाते. कदाचित शेवटच्या ठरणार्‍या मंत्रीमंडळाच्या विस्तारात महाडचे आमदार भरत गोगावले यांना स्थान मिळणार का याची अधिक उत्सुकता रायगडकरानां लागली आहे. मंत्रिमंडळ विस्तारात खराब कामगिरी करणार्‍याचा पत्ता कट होणार असल्याचीही जोरदार चर्चा आहे.

मुख्यमंत्री एकनाथ शिंदे यांच्या पहिल्या मंत्रिमंडळात सुरुवातीला स्वतःच्या गळ्यात पडणारी मंत्रीपदाची माळ गोगावले यांनी दिपक केसरकर यांच्या गळ्यात घातली होती. याबाबत गोगावले यांनी, जाहीरपणे बोलून दाखवले होते. त्यामुळे त्यांच्यावर पस्तावण्याची वेळ आली होती. त्यानंतरच्या मंत्रीमंडळात शिंदे गटातील आमदारांना विशेष करुन गोगावले यांना स्थान न देता राष्ट्रवादी काँग्रेसच्या अजित पवार गटातील 11 आमदारांना मंत्रीपदाची शपथ देण्यात आली होती. त्यामुळे गोगावले यांची संधी हुकली होती.

27 जूनपासून राज्य विधिमंडळाच्या पावसाळी अधिवेशनाला सुरुवात होणार आहे. यापूर्वीच राज्य मंत्रिमंडळाचा विस्तार पार पाडण्यात येणार असे बोलले जात आहे. लोकसभा निवडणुकीत अपेक्षित यश न मिळाल्याने तिन्ही पक्षातील काही आमदारांजी नाराजी दुर करण्याचा प्रयत्न केला जाणार आहे. तिन्ही पक्षातील काही आमदारांना मंत्रिपदाची लॉटरी लागणार आहे. तसेच नवीन चेहर्‍यांना संधी दिली जाणार असून यात रायगड जिल्ह्यातील महाडचे आमदार भरत गोगावले यांची वर्णी लागणार असल्याचे बोलले जात आहे. शिंदे गटाच्या बंडात महत्वपूर्ण भूमिका बजावणारे महाडचे आमदार भरत गोगावले यांचा पहिल्याच मंत्रिमंडळ विस्तारात समावेश होण्याची शयता होती. मात्र बेरीज वजाबाकीच्या राजकारणात गोगावले यांनी दुसर्‍या आमदारांना संधी दिली. त्यामुळे नाराज झालेले भरत गोगावले यांचे मंत्री पद हा गमतीचा विषय झाला होता. लोकसभा निवडणुकीपूर्वी राष्ट्रवादी काँग्रेसचे प्रदेशाध्यक्ष सुनील तटकरे यांनी गोगावले यांना जाहीर सभेत आगामी मंत्रीमंडळ विस्तारात गोगावले यांना निश्‍चित मंत्रीपद मिळणार असल्याचे सांगितले होते. त्यामुळेच आता होणार्‍या मंत्री मंडळ विस्तारात गोगावले यांचे स्थान निश्‍चित मानले जात आहे.