पनवेलमध्ये अतिक्रमणांवर महापालिकेचा दणका

| पनवेल | प्रतिनिधी |

पनवेल महानगरपालिका हद्दीतील रस्ते व पदपथ अतिक्रमणमुक्त करण्यासाठी महापालिकेने धडक मोहीम हाती घेतली असून, कामोठे, पनवेल, कळंबोली आणि खारघर परिसरात अनधिकृत फेरीवाले, भाजी विक्रेते, हातगाड्या, नर्सरी तसेच दुकान-हॉटेलच्या बाहेरील अनधिकृत शेडवर कारवाई करण्यात आली आहे. आयुक्त मंगेश चितळे यांच्या सूचनेनुसार सुरू असलेल्या या मोहिमेत काही ठिकाणी टेम्पो व हातगाड्या जप्त करण्यात आल्या असून, अतिक्रमणे हटविण्यासाठी जेसीबीचा वापर करण्यात आला.

कामोठ्यात भाजी विक्रेत्यांवर कारवाई
कामोठे सेक्टर 21 आणि 22 मध्ये रस्त्यावर अनधिकृतपणे व्यवसाय करणाऱ्या भाजी विक्रेत्यांवर कारवाई करण्यात आली. यावेळी काही टेम्पो जप्त करण्यात आले. तसेच खांदा कॉलनी परिसरातही अतिक्रमणविरोधी मोहीम राबविण्यात आली.

पनवेलमध्ये हातगाड्यांवर तोडक कारवाई
पनवेल मार्केट यार्ड परिसरातील रस्त्यावर अनधिकृतपणे लावण्यात आलेल्या हातगाड्यांवर महापालिकेच्या पथकाने तोडक कारवाई केली. यावेळी हातगाड्यांसह त्यावरील सामान जप्त करण्यात आले. दरम्यान, नवीन पनवेल येथील डी-मार्टसमोरील परिसरात अनधिकृत बाजार भरू नये, यासाठी अतिक्रमणविरोधी पथकातील कर्मचारी आणि सुरक्षा रक्षक तैनात करण्यात आले आहेत.

कळंबोलीत नर्सरी, भाजी विक्रेत्यांवर कारवाई
कळंबोली परिसरातही अतिक्रमणविरोधी कारवाई करण्यात आली. पोलीस मुख्यालयाकडे जाणाऱ्या रस्त्यावर अनधिकृत व्यवसाय करणाऱ्यांवर कारवाई करण्यात आली. गणपती तलावाजवळील अनधिकृत नर्सरीवरही कारवाई करण्यात आली. तसेच रोडपाली बस डेपो परिसरातील अनधिकृत भाजी विक्रेत्यांवर कारवाई करून भाजीपाला जप्त करण्यात आला. कळंबोली सेक्टर 20 मध्ये दुकाने व हॉटेल्सच्या बाहेरील अनधिकृत शेडवर जेसीबीच्या साह्याने मोठी तोडक कारवाई करण्यात आली. यावेळी उपायुक्त रविकिरण घोडके उपस्थित होते.

खारघरमध्ये अनधिकृत नर्सरींवर कारवाई
खारघर परिसरातील अनधिकृत नर्सरी तसेच फुटपाथवर अनधिकृत व्यवसाय करणाऱ्यांवर महापालिकेच्या पथकाने कारवाई केली. पदपथांवरील अतिक्रमणे हटवून नागरिकांसाठी मार्ग मोकळा करण्यावर महापालिकेने भर दिला आहे.

आसूडगावात पदपथ मोकळे
आसूडगाव पेट्रोल पंपाजवळील पदपथावर करण्यात आलेली अतिक्रमणे तसेच अनधिकृत नर्सरी अतिक्रमण विभागाच्या पथकाने हटविली. त्यामुळे परिसरातील पदपथ नागरिकांसाठी मोकळे करण्यात आले आहेत.

कामोठे, खारघर, पनवेल आणि कळंबोली परिसरातील रस्ते व पदपथांवरील अतिक्रमणे हटविण्यावर महापालिकेने विशेष भर दिला आहे. अनधिकृत व्यवसाय, हातगाड्या, नर्सरी आणि रस्ते-पदपथांवरील अतिक्रमणांविरोधातील मोहीम यापुढे आणखी तीव्र करण्यात येणार असल्याची माहिती अतिरिक्त आयुक्त महेशकुमार मेघमाळे यांनी दिली.