वांद्रे येथील वृद्ध महिलेची हत्या

| मुंबई | प्रतिनिधी |

वांद्रे येथील परिसरात वृद्ध महिलेचे हातपाय बांधून हत्या करण्यात आल्याची घटना घडली आहे. वांद्रे येथील रिक्लेमेशन परिसरातील इमारतीमधील सदनिकेत 64 वर्षीय महिलेचा मृतदेह सापडला. महिलेचे हात, पाय बांधून शस्त्राने गळ्यावर वार करून त्यांची हत्या करण्यात आली आहे. याप्रकरणी वांद्रे पोलीस ठाण्यात हत्येचा गुन्हा दाखल करण्यात आला आहे. शवविच्छेदनासाठी मृतदेह वांद्रे येथील भाभा रुग्णालयात नेण्यात आल्याची माहिती पोलिसांनी दिली आहे.

मिळालेल्या माहितीनुसार, वांद्रे परिसरातील रिक्लेमेशन डेपो परिसरातील कांचन इमारत क्रमांक- 13 मधील दुसऱ्या मजल्यावरील सदनिकेत 64 वर्षीय महिलेचा मृतदेह सापडला. ओढणीने महिलेचे हात, पाय बांधून शस्त्राने त्यांच्या गळ्यावर वार करण्यात आले. चार – पाच दिवसांपूर्वीच महिलेची हत्या करण्यात आल्याचा संशय आहे. रेखा अशोक खोंडे असे मृत महिलेचे नाव आहे. शवविच्छेदनासाठी मृतदेह वांद्रे येथील भाभा रुग्णालयात नेण्यात आला. घरातील सर्व वस्तू व दरवाजाची पाहणी केली असता आरोपी घरात जबरदस्तीने शिरलेला नाही. त्यामुळे या प्रकरणी महिलेच्या परिचित व्यक्तीचाच सहभाग असल्याचा पोलिसांना संशय आहे. या माहितीच्या आधारे महिलेच्या एका नातेवाईकाला संंशयावरून वांद्रे पोलिसांनी ताब्यात घेतले आहे. त्याची चौकशी सुरू आहे. हत्येचे नेमके कारण अद्याप स्पष्ट झालेले नाही. याबाबत पोलीस अधिक तपास करीत आहेत.