। पुणे । प्रतिनिधी ।
प्रियकर सतत मानसिक त्रास देत असल्याने प्रेयसीने मित्रांच्या मदतीने हत्या केल्याची धक्कादायक घटना पिंपरी-चिंचवडमध्ये घडली आहे. याप्रकरणी या कटात सहभागी असलेल्या तिघांसह महिलेला आणि अल्पवयीन मुलीला ताब्यात घेतले आहे.
बालाजी उर्फ बाळू मचक लांडे असे हत्या करण्यात आलेल्या प्रियकराचे नाव असून रेखा विश्वंभर भातनासे असे आरोपी प्रेयसीचे नाव आहे. आधी हे हत्या प्रकरण अपघात आहे असा बनवा रचण्यात आला होता. परंतु, गुंडाविरोधी पथकामुळे आरोपींचा बनाव उघड झाला आहे.
हत्या झालेल्या बालाजीचा अपघात झाल्याचा बनाव रचून त्याला वासीएम रुग्णालयात दाखल करण्यात आले. परंतु, त्याचा उपचारापूर्वीच मृत्यू झाला होता. आरोपी रिक्षाचालक दिनेश सूर्यकांत उपादे, आदित्य शरद शिंदे यांच्यासह इतरांनी पोलिसांची दिशाभूल करण्यासाठी बनावट नावे सांगितली होती. ही बाब लक्षात येताच पोलीस उपायुक्त संदीप डोईफोडे यांनी समांतर तपास करण्याबाबत सूचना दिल्या. गुंडाविरोधी पथकातील पोलिस कर्मचाऱ्यांनी आजूबाजूचे अनेक सीसीटीव्ही फुटेज तपासले असता चिखलीतील दुर्वांकुर सोसायटीच्या लिफ्टमध्ये काही रक्ताचे डागदेखील आढळले. फ्लॅट नंबर ३०३ मध्ये अल्पवयीन मुलगी दिसली. तिला पोलिसांनी विश्वासात घेऊन मृत्यू झालेल्या व्यक्तीचा फोटो दाखवला आणि ओळख पटवण्याचा प्रयत्न केला. तेव्हा त्याचे नाव बालाजी उर्फ बाळू मचक लांडे असून तो बीडमधील दिंदृडचा रहिवाशी असल्याचे समझले. तसेच मुलीची आई रेखा विश्वभंर भातनासे आणि इतर चार साथीदारांनी हत्या केली असल्याचे कबूल केले. पोलिसांनी रिक्षाचालक दिनेश सूर्यकांत उपादे, आदित्य शरद शिंदे यांना ताब्यात घेतले असून इतर तीन आरोपी फरार असून पोलीस त्यांचा शोध घेत आहेत.