प्रिया नाईक यांची हत्या; दोघे जण ताब्यात

| नवीन पनवेल | प्रतिनिधी |

पनवेल शहरातील माणेक नगर सोसायटी येथील प्रिया प्रल्हाद नाईक (44) यांची अज्ञात इसमाने गळा आवळून हत्या केल्याप्रकरणी आरोपींविरोधात पनवेल शहर पोलीस ठाण्यात हत्येचा गुन्हा दाखल करण्यात आला. या हत्येमुळे परिसरात खळबळ उडाली आहे. यातील दोन आरोपींना पोलिसांनी अटक केल्याची माहिती समोर आली आहे.

13 सप्टेंबर रोजी प्रिया नाईक यांच्या गळ्यावर व्रण व नाका-तोंडातून रक्त येत होते. त्यांना सहस्त्रबुद्धे हॉस्पिटल, पनवेल येथे नेले असता डॉक्टरांनी मृत घोषित केले. त्यानुसार पनवेल शहर पोलीस ठाण्यात अकस्मात मृत्यूची नोंद करण्यात आली होती. सदरचा प्रकार हा संशयास्पद वाटत असल्याने पोलिसांनी आय-बाईक, अंगुली मुद्रातज्ज्ञ, श्‍वानपथक, न्यायवैद्यकीय सहाय्यक पथक यांना पाचारण केले व घटनास्थळाची पाहणी केली. प्रिया नाईक त्यांच्या घरी असताना कोणत्यातरी दोरी किंवा वायरसदृश्य वस्तूने गळा अळून अज्ञाताने त्यांची हत्या केली. त्यानंतर त्यांच्या घराचा दरवाजा ओढून आरोपी पळून गेला. याप्रकरणी पनवेल शहर पोलीस ठाण्यात 15 सप्टेंबर रोजी हत्येचा गुन्हा दाखल करण्यात आला. प्रिया नाईक यांची हत्या कोणी केली आणि कशासाठी केली, हे गुलदस्त्यात आहे. पनवेल शहर पोलिसांनी यातील दोन आरोपींना ताब्यात घेतल्याची माहिती समोर आली आहे. याप्रकरणी पोलीस अधिक तपास करत आहेत.