माथेरान घाटरस्त्यात निसर्गाच्या रंगांची उधळण

। माथेरान । वार्ताहर ।
निसर्गाची अदभूत लीलया ,वसंत ऋतू मधील नैसर्गिक रंगपंचमीच्या छटा एक विलोभनीय देखावा पाहण्यासाठी आणि खर्‍या खुर्‍या या दैवी शक्तीने प्रस्थापित केलेल्या वृक्षवल्ली वरील शिंपण केलेल्या आपल्या अविष्काराने वेगवेगळ्या रंगांची उधळण मुक्त हस्ते केलेली ही नयनरम्य दृश्ये पाहण्यासाठी आवर्जून माथेरानला भेट दिल्याशिवाय ही साक्षात प्रचिती प्राप्त होऊ शकत नाही. तसे पाहिल्यास माथेरान मध्ये सर्व ऋतूत नयनरम्य देखावे न्याहाळता येतात. पावसाळ्यात तर संपूर्ण डोंगर वर्षाऋतु मध्ये न्हाऊन निघाल्यावर उंचीवरून फेसाळत वाहणारे जलप्रपात, शुभ्र पाण्याचे निर्झर, हिरवागार शालू परिधान केलेला काळाकभिन्न डोंगर ही सारी दृष्ये डोळ्यांची पारणे फेडणारी असतात त्याचप्रमाणे वसंत पंचमी पासून वसंतऋतुला सुरुवात होते. रंगपंचमी आलेली असताना निसर्ग मुक्तहस्ताने रंगांची उधळण करत असताना इथे दिसतो. पळस फुलतो, काटेसावर बहरतो, मोगर्‍याची फुले निसर्गाच्या शृंगारात भर टाकतात आणि सुरु होतो निसर्गाचा रंगोत्सव !
जिल्ह्यातील जगप्रसिद्ध थंड हवेचे ठिकाण असणार्‍या माथेरानच्या डोंगर शिवारामध्ये काटेसावर, पळस रानमोगरा आदी पुष्पवैभव दिमाखात नजरेस पडते, तर त्याच बरोबर अनेक वृक्ष ही आपल्या पूर्ण-फुलांनी आपला अवतार बदलू पाहतात. निसर्गात अनेक ठिकाणी आपण फुलांच्या वेगवेगळ्या रंगछटा, त्याचे वैभव पाहत असतो. परंतु माथेरान आणि त्याच्या अवतीभवती वृक्षांनी आपलं रूपडं पालटून घेतलेले दिसते. हिरव्या गच्च असणार्‍या झाडांमधून कोवळी पालवी धारण करून रंगीबिरंगी छटा दिवसागणिक नजरेस पडतात. आज पानझड, उद्या गुलाबी कोवळी पाने, परवा गडद लाल पाने तर पुढे एकेक दिवस आणखी रंग बदलून पुन्हा हिरव्या रंगाकडे मार्गक्रमण करत पाने आपली पूर्वावस्था धारण करतात. हा प्रवास निसर्ग प्रेमींसाठी पर्वणी आणि नजरेस सुखावणारा आहे.
वसंतोत्सवातील प्रमुख सण म्हणजे रंगपंचमी. हा रंगांचा सण आनंद द्विगुणित करणारा आहे. वसंताच्या आगमनाबरोबर निसर्ग रंगपंचमी खेळायला सुरुवात करतो. वेगवेगळ्या रंगांची उधळण तो मुक्तहस्ते करत असतो. कधी वातावरणातील आणि मनातील मरगळ झटकून टाकणारा रंगांचा उत्सव सुरू असताना निसर्गातील रंगोत्सव डोळ्याचे पारणे फेडत असतो.
आपल्याला रस्त्याच्या कडेला, बागेत पिवळ्या झुपक्याचा बहावा दिसतो, कुठे जांभळ्या रंगाच्या कागदी फुलांचा ताम्हण लक्ष वेधतो तर कुठे पांगारा, काटेसावर बोगनवेल अशी विविध प्रकारची फुलझाडे बहरतात, तेव्हा अवचित आपले लक्ष वेधून घेतात. पण माथेरानचा डोंगर कुशीत, त्यांच्या अंगाखांद्यावर फुलांच्या बरोबरच अनेक झाडांच्या पानांनी रंग भरलेला दिसून येतो.
सुरुवातीला पानगळ झाली आणि निसर्गात अगदी नैराश्य निर्माण झाले आणि थोड्याच दिवसात पुन्हा त्या झाडाला नवी पालवी निर्माण झाली, पुन्हा नवचैतन्य निसर्गामध्ये निर्माण झालं. अशा ह्या रंगोत्सवात रंग खेळणारा निसर्ग आज माथेरानच्या अवतीभोवती दिसतोय.मन अगदी प्रसन्न होते. कदाचित तो आपल्याला सांगत असावा की चला तुम्ही सुद्धा तुमच्याकडची मरगळ झटकून टाका आणि पुन्हा नव्याने, नव्या उमेदीने प्रसन्नतेने नवी झालर पांघरून, नव्या आशा उराशी बाळगून कामाला लागा..