सिडकोविरोधात नवघरकरांचा एल्गार

विविध मागण्यांसाठी 15 नोव्हेंबरला लाक्षणिक उपोषण

| उरण | वार्ताहर |

तालुक्यातील नवघर व गाव परिसरातील विविध समस्या व ग्रामस्थांच्या मागण्यांसंदर्भात सिडकोकडे सातत्याने अर्ज विनंत्या, पाठपुरावा करुनसुद्धा प्रशासनाला जाग येत नाही. ग्रामस्थांच्या समस्या आणि मागण्यांकडे सिडको प्रशासनाने जाणूनबुजून दुर्लक्ष करीत आहे. झोपलेलेल्या प्रशासनाला जागे करण्यासाठी रायगडभूषण प्रा. एल.बी. पाटील व मर्मगंध पाटील यांच्या नेतृत्वाखाली लाक्षणिक उपोषण करण्याचा निर्धार ग्रामस्थांनी केला आहे.

दरम्यान, (दि.6) नवघर ग्रामस्थांचे प्रा. एल.बी.पाटील यांच्या नेतृत्वाखाली नव्याने होऊ घातलेल्या नवघर रेल्वे स्टेशनला नवघर रेल्वे स्टेशन हेच नाव देण्यात यावे, नवघर ते नवघरफाटा रूग्णवाहीका तसेच छोटी वाहने येण्या-जाण्यासाठी रेल्वे क्रॉसिंग रस्ता करणे, नवघर येथे होणार्‍या रेल्वे स्टेशनमध्ये निर्माण होणार्‍या नोकर्‍या आणि व्यवसायामध्ये स्थानिक नवघर सिडको प्रकल्पग्रस्तांना प्रथम प्राधान्य द्यावे तसेच इतर मागण्यांसाठी द्रोणागिरी नोड सिडको कार्यालय बोकडवीरा येथे धरणे आंदोलन करण्यात आले होते. त्यावेळी द्रोणागिरी नोडचे अधिकारी नहाने यांनी सिडकोचे वरिष्ठ अधिकारी सेवतकर यांच्यासोबत ऑन स्पीकर फोनवर प्रा. एल.बी. पाटील यांच्यासह नवघर ग्रामस्थांची चर्चा घडवून दिली असता प्रा. एल.बी. पाटील यांनी येथील रेल्वे स्टेशनमुळे उद्भवणार्‍या समस्या सिडकोचे वरिष्ठ अधिकारी सेवतकर यांना समजावून सांगितल्या असता आपल्या समस्या योग्य असून, नवघर ग्रामस्थांची सिडकोच्या वरिष्ठ अधिकारी तसेच रेल्वे प्रशासना सोबत सयुक्त बैठक घेऊन योग्यच निर्णय घेण्याचे मान्य केले केले होते.

सिडको आधिकारी सेवतकर आणि नहाने यांच्यासोबत झालेल्या चर्चेनुसार तूर्तास उपोषण स्थगित करण्यात आले असता जर दि.15 पर्यंत ग्रामस्थांसोबत बैठक घेऊन जर योग्य निर्णय दिला नाही, तर (दि.15) आम्ही नवघर ग्रामस्थ उग्र आंदोलन करणार असे ग्रामस्थांसहीत रायगड भूषण प्रा.एल.बी.पाटील यांनी ठणकावून सांगितले होते. असे असताना सिडको प्रशासनाला याची जाणीव नाही असेच दिसून येत आहे तसेच नवघर ग्रामस्थांच्या लाक्षणिक उपोषणाच्या वेळी झालेल्या वाटाघाटीच्या चर्चेचा सिडको प्रशासनाला विसर पडलेला दिसत आहे. ग्रामस्थांना सिडको व रेल्वे प्रशासनाकडून कोणतेही योग्य ते प्रतिसाद अजूनही मिळाला नाही.

प्रा. एल.बी. पाटील यांच्या नेतृत्वाखाली नवघर ग्रामस्थांनी (दि.15) ठिक 10.30 वाजल्यापासून द्रोणागिरी नोड, सिडको कार्यालय बोकडवीरा येथे लाक्षणिय (उपोषण) धरणे आंदोलन करण्याचा निर्धार केला आहे. या उपोषणाला ग्रामस्थांनी, नागरिकांनी, सामाजिक कार्यकर्त्यांनी, विविध सामाजिक संस्था, संघटनांनी मोठ्या संख्येने उपस्थित राहून या उपोषणाला जाहीर पाठिंबा द्यावा, असे आवाहन प्रा. एल.बी. पाटील यांनी केले आहे.