दुसऱ्या टर्मिनलच्या उभारणीची प्रक्रिया सुरू
| उरण | प्रतिनिधी |
नवी मुंबई आंतरराष्ट्रीय विमानतळाच्या विस्ताराला वेग आला असून, दुसऱ्या टर्मिनलच्या उभारणीसाठी सिडकोने महत्त्वाची प्रशासकीय प्रक्रिया सुरू केली आहे. या प्रकल्पासाठी स्वतंत्र अभियंता नियुक्त करण्यासाठी ई-निविदा प्रसिद्ध करण्यात आली असून, त्यामुळे विमानतळाच्या दुसऱ्या टर्मिनलच्या प्रत्यक्ष कामाला लवकरच गती मिळण्याची शक्यता आहे.
मुंबई विमानतळावरील वाढता ताण कमी करण्यासाठी उभारण्यात आलेल्या नवी मुंबई आंतरराष्ट्रीय विमानतळाचे पहिले टर्मिनल गेल्या वर्षी डिसेंबरपासून कार्यान्वित झाले आहे. तेव्हापासून देशांतर्गत विमानसेवेला प्रवाशांचा मोठा प्रतिसाद मिळत असून, आतापर्यंत सुमारे 23 लाख प्रवाशांनी या विमानतळाचा वापर केला आहे. वाढत्या प्रवासी संख्येच्या पार्श्वभूमीवर दुसऱ्या टर्मिनलची उभारणी आवश्यक बनली आहे.
विमानतळाच्या मूळ आराखड्यानुसार येथे चार टर्मिनल आणि दोन धावपट्ट्यांची तरतूद आहे. सध्या पहिले टर्मिनल कार्यरत असून, आता दुसऱ्या टर्मिनलच्या उभारणीसाठी तांत्रिक नियोजन, गुणवत्ता नियंत्रण आणि कामाच्या देखरेखीसाठी स्वतंत्र अभियंता नियुक्त करण्यात येणार आहे. सिडकोच्या परिवहन व विमानतळ विभागाने प्रसिद्ध केलेल्या ई-निविदेनुसार, विमानतळाच्या तिसऱ्या टप्प्यातील विकासासह पहिला आणि दुसरा टप्पा यांच्या कामांवर देखरेख करण्यासाठी आंतरराष्ट्रीय दर्जाच्या अनुभवी संस्था, संयुक्त उपक्रम किंवा कन्सोर्टियमकडून प्रस्ताव मागविण्यात आले आहेत. नियुक्त अभियंत्याची मुदत 36 महिन्यांची असेल आणि गुणवत्ता तसेच खर्च या निकषांवर अंतिम निवड केली जाणार आहे. दुसरे टर्मिनल आणि दुसरी धावपट्टी नियोजित वेळेत पूर्ण झाल्यास विमानतळाची प्रवासी क्षमता लक्षणीय वाढणार आहे. त्याचा थेट फायदा नवी मुंबई, उरण, पनवेल आणि संपूर्ण मुंबई महानगर प्रदेशातील उद्योग, व्यापार, पर्यटन व रोजगाराला होणार असल्याचे तज्ज्ञांचे मत आहे.
नवी मुंबई आंतरराष्ट्रीय विमानतळाचा विस्तार हा केवळ पायाभूत सुविधा विकासाचा प्रकल्प नसून महाराष्ट्राच्या आर्थिक प्रगतीला नवी चालना देणारा महत्त्वाकांक्षी टप्पा मानला जात आहे. त्यामुळे दुसऱ्या टर्मिनलच्या उभारणीसाठी सुरू झालेल्या या प्रक्रियेकडे उद्योग, विमान वाहतूक क्षेत्र आणि स्थानिक नागरिकांचे लक्ष लागले आहे.