खुशखबर! आता शिक्षकांचे वेतन वेळेत मिळणार

| अलिबाग | प्रतिनिधी |
रायगड जिल्हा परिषदेच्या प्राथमिक शिक्षकांना वेतन वेळेवर मिळावे यासाठी शासनाने सीएमपी प्रणाली( रोख व्यवस्थापन प्रक्रिया) सुरु केली आहे. या प्रणालीद्वारे शिक्षक, शिक्षकेत्तर कर्मचाऱ्यांच्या खात्यात आता थेट वेतन जमा होणार आहे. याची सुरुवात रायगड जिल्हा परिषदेने केली असून ऑक्टोबर महिन्याच्या पहिल्या आठवड्यात मिळणारे वेतन 29 सप्टेंबरलाच पाच हजार 608 जणांचे वेतन खात्यात जमा झाले आहे.

रायगड जिल्हा परिषदेच्या शिक्षक व शिक्षकेत्तर कर्मचाऱ्यांचे वेतन याआधी मुख्य लेखा व वित्त अधिकारी यांच्या मंजुरीनंतर गटविकास अधिकारी यांच्याकडे पाठविले जात होते. त्यानंतर तालुका स्तरातून सर्व शिक्षक, शिक्षकेत्तर कर्मचाऱ्यांच्या खात्यामध्ये वेतन जमा होत असे. ही प्रक्रिया त्रासदायक ठरत असल्याने रायगड जिल्हा परिषदेने गतवर्षापासून झेडपीएफएमएस प्रणाली सुरु केली.

कोषागार कार्यालयातून निधी मंजूर झाल्यावर मुख्य लेखा व वित्त अधिकारीमार्फत थेट शिक्षकांच्या खात्यात वेतन जमा करण्याची सुविधा सुरु केली. या कालावधीलादेखील तीन ते पाच दिवस लागत असत. त्यामुळे आता थेट शिक्षक, शिक्षकेत्तर कर्मचाऱ्यांच्या खात्यात पैसे जमा करण्यासाठी सर्वात सोपी पध्दत सुरु करण्यात आली आहे. जिल्हा परिषद शाळेतील शिक्षकांचे वेतन सीएमपी प्रणालीमार्फत दिले जाणार आहे. कोषागार कार्यालयातून निधी मंजूर झाल्यानंतर मुख्य लेखा व वित्त अधिकारीमार्फत मान्यता मिळाल्यावर थेट शिक्षकांच्या खात्यात वेतन जमा होणार आहे. याची सुरुवात रायगड जिल्हा परिषदेने केली असून सप्टेंबरचे वेतन 1 ऑक्टोबरच्या ऐवजी 29 सप्टेंबरलाच ऑनलाईन पध्दतीने झाले आहे.

रायगड जिल्हा परिषद अंतर्गत प्राथमिक शिक्षक पाच हजार 551 व केंद्रप्रमुख 57 अशा पाच हजार 608 जणांचे वेतन या प्रणालीद्वारे झाले आहे. या संपूर्ण प्रक्रियेचे महत्वपूर्ण मार्गदर्शक मुख्य कार्यकारी अधिकारी अधिकारी डॉ. भरत बास्टेवाड ,मुख्य लेखा व वित्त अधिकारी,तसेच जिल्हा कोषागार अधिकारी यांचे विशेष सहकार्य प्राप्त झाले आहे.

सीएमपी अर्थात रोख व्यवस्थापन प्रक्रिया याप्रणालीद्वारे शिक्षकांचे वेतन देण्यासाठी शासनाने प्रायोगिक तत्वावर रायगड जिल्ह्याची निवड केली आहे. त्यानुसार जिल्हा परिषद शाळेतील शिक्षक व शिक्षकेत्तर कर्मचारी यांचे वेतन सीएमपी प्रणालीद्वारे करण्याचा निर्णय मुख्य कार्यकारी अधिकारी यांच्या मार्गदर्शनाखाली घेण्यात आला. ही प्रणाली सोपी असून सुट्टीच्या दिवशीदेखील शिक्षकांचे वेतन ऑनलाईन पध्दतीने थेट खात्यात जमा होणार आहे. याची सुरुवात या महिन्यापासून सुरु केली आहे. त्यामुळे शिक्षकांना आता वेतनासाठी जास्त वेळ थांबण्याची गरज निर्माण होणार नाही.
पुनिता गुरव – शिक्षणाधिकारी, प्राथमिक विभाग, रायगड जिल्हा परिष