डोक्यात नारळ पडून एकाचा दुर्दैवी मृत्यू

| मुरुड | प्रतिनिधी |

मुरुड समुद्रकिनारी शहाळे खरेदी करण्यासाठी गेले असताना राजपुरी गावातील 48 वर्षांच्या इसमाचा डोक्यात नारळ पडल्याने दुर्दैवी मृत्यू झाला. जयेश पांडुरंग गीते असे या मृत इसमाचे नाव आहे. राजपुरी येथील शिव मंदिरामध्ये अभिषेक पूजेसाठी शहाळे खरेदी करण्यासाठी गेले असता ही घटना घडली. यामुळे परिसरात हळहळ व्यक्त होत आहे.

रविवारी (दि. 5) सायंकाळच्या सुमारास मुरुड समुद्रकिनारी श्रीयश रुग्णालयाच्या बाजूला असलेल्या चंदन खोत यांच्या शहाळे स्टॉलवरून शहाळे खरेदी करून निघण्याच्या तयारीत असताना येथे असलेल्या 90 फूट उंच नारळाच्या झाडावरून वेगाने नारळ डोक्यात पडल्याने जयेश तिथल्या तिथेच जागीच गतप्राण झाला. या दुर्दैवी घटनेनंतर संपूर्ण मुरुड तालुक्यासह राजपुरी गावात हळहळ व्यक्त करण्यात येत आहे.