कत्तलीसाठी नेणार्‍या गुरांची सुटका

टेम्पासह चार लाखांचा ऐवज जप्त

| कर्जत | प्रतिनिधी |

कर्जत तालुक्यातील पिंपळपाडा गावाच्या बाजूकडून साळोख गावाकडे गुरे कत्तल करण्यासाठी घेऊन जाणारा टेम्पो पोलिसांच्या सतर्कमुळे पकडण्यात आला. कर्जत पोलिसांनी याबाबत गुन्हा दाखल केला असून, 4 लाख 22 हजारांचा ऐवज जप्त करुन जनावरांची सुटका केली आहे. याबाबत पुढील तपास कर्जत पोलीस करीत आहेत.

गुरांची चोरी करून कत्तलीसाठी जाणारा टेम्पो कर्जत पोलिसांनी पकडला याबाबतची घटना अशी कर्जत पोलीस ठाण्याचे पोलीस कर्मचारी लालासो तोरवे आणि पोलीस कर्मचारी राहूल जाधव हे 6 जानेवारी रोजी पहाटे साडेचारच्या वाजता कर्जत पोलीस ठाण्याच्या हद्दीत गस्त घालीत असताना एक टेम्पो त्यांना संशयास्पद आढळला. त्यांनी तो अडवला. टेम्पोची तपासणी केली असता टेम्पोमध्ये गुरे आढळली.

टेम्पोमध्ये एकूण सात गोवंश जातीची जनावरे आढळली. ही गुरे चोरी करून साळोख गावाकडे घेऊन जाताना पोलिसांना मिळाली. पोलिसांनी टेम्पो कर्जत पोलीस ठाण्यात आणून गुरे चोरणार्‍यांवर कारवाई केली. यामध्ये अजय चंद्रकांत चवर (20) व महेश अंकुश हीलम (19) दोघेही रा. साळोख यांना ताब्यात घेतले असून, यामधील दोन अज्ञात इसम फरार आहेत. दरम्यान, सात गोवंश जातीची जनावरे व टेम्पो असा एकूण 4 लाख 22 हजारांचा ऐवज पोलिसांनी जप्त केला आहे. जनावरांना नजीकच्या गोशाळेत पाठवण्यात आले आहे. पुढील तपास कर्जत पोलीस ठाण्याचे पोलीस निरीक्षक सुरेंद्र गरड यांच्या मार्गदर्शनाखाली पोलीस हावलदार लालासो तोरवे करीत आहेत.