अपघातात एक ठार, एक जखमी

| रायगड | वार्ताहर |

मुंबई-गोवा राष्ट्रीय महामार्गावर महाड तालुक्यातील वहूर येथे दुचाकीच्या झालेल्या अपघातात एकाचा दुर्दैवी मृत्यू झाला, तर चालक किरकोळ जखमी झाला आहे. सदरचा अपघात शुक्रवारी दुपारी 4 वाजण्याच्या सुमारास घडला. दिगंबर माळजी नाकते (40), रा. मुंबई असे मृत व्यक्तीचे नाव आहे. महेंद्र दामोदर नाकते (30 ) आणि दिगंबर माळजी नाकते, दोघे राहणार डोंबिवली हे दोघे दुचाकीवरुन चिपळूण ते मुंबई-डोंबिवली असा मुंबई-गोवा राष्ट्रीय महामार्गाने प्रवास करत होते. महाड तालुक्यातील वहूर गाव हद्दीत आल्यानंतर दुचाकी चालक महेंद्र याचा गाडीवरून ताबा सुटला आणि गाडी रस्त्यावर घसरत गेली. दुचाकीवर मागे बसलेले दिगंबर हे रस्त्यावर आपटले. त्यांच्या डोक्याला जबर मार लागल्याने त्यांचा मृत्यू झाला, तर चालक महेंद्र हे किरकोळ जखमी झाले. अपघाताची माहिती मिळताच महामार्ग वाहतूक शाखा पोलीस महाड यांनी घटनास्थळी धाव घेतली. अपघातग्रस्त वाहन बाजूला करत जखमींना महाड ग्रामीण रुग्णालयात उपचारासाठी दाखल केले.