। खोपोली । प्रतिनिधी ।
नगरपालिका हाद्दील ताकई नगर गाव साजगांव ग्रामपंचायतीला लागून आहे. याठिकाणी अनेक वर्षापासून समाज मंदीर सभागृह नसल्यामुळे धार्मिक विधीसह सार्वजनिक कार्यक्रम भर उन्हात होत असत. त्यामुळे महिलांकडून संताप व्यक्त होत होता. सुसज्ज सभागृह उभारण्यासाठी गेली वीस वर्षात नगराध्यक्षांनी भूमिपूजन करूनही इमारत मात्र प्रतिक्षेत होती. स्थानिक नगरसेवक नासीर पटेल यांनी दिलेला शब्द पाळत नगराध्यक्षा सुमन औसरमल यांच्या मार्गदर्शनाखाली निधी उपलब्ध करीत वीस वर्षाच्या प्रतिक्षेनंतर समाजमंदिराची इमारत उभारत डॉ. बाबासाहेब आंबेडकर संस्कार केंद्र असे नाव नगराध्यक्षा औसरमल यांनी देत याठिकाणी चांगले संस्कार पुढील पिढीवर करण्याचे अवाहन नगराध्यक्षा सुमन औसरमलांनी लोकार्पण सोहळ्यात बोलताना केले आहे.
खोपोली नगर पालिकेच्या माध्यमातून ताकई नगर (सारसन) येथे उभारलेल्या डॉ. बाबासाहेब आंबेडकर संस्कार केंद्राचे लोकार्पण नगराध्यक्षा सुमन औसरमल यांच्या हस्ते करण्यात आले. याप्रसंगी उपनगराध्यक्षा विनिता कांबळे, गटनेते नगरसेवक सुनील पाटील, किशोर पानसरे, नगरसेविका केविना गायकवाड, निर्मला शेलार, प्रमिला सुर्वे, सुनिता गायकवाड, शेकाप जिल्हा चिटणीस किशोर पाटील, आरपीआयचे जिल्हा युवक अध्यक्ष नरेंद्र गायकवाड, शहर अध्यक्ष चिंतामणी सोनावणे, राष्ट्रवादी युवक अध्यक्ष अतुल पाटील, महिला अध्यक्षा सुवर्णा मोरे, माजी नगरसेवक संजय पाटील, कैलास गायकवाड, आनंद नायडू, युवानेते प्रमोद महाडिक, अॅड.रामदास पाटील, किसन पाटील, जयवंत पाटील, शेतकरी नेते शांताराम पाटील, प्रसाद वाडकर आदी पदाधिकारी उपस्थित होते.