मिसिंग लिंक बोगद्यात फॉर्च्युनरची टेम्पोला धडक

एकाचा मृत्यू; एक गंभीर जखमी

|खोपोली |प्रतिनिधी |

मुंबई-पुणे द्रुतगती मार्गावरील मिसिंग लिंकच्या सुमारे नऊ किलोमीटर लांबीच्या बोगद्यात शुक्रवारी पहाटे दीडच्या सुमारास फॉर्च्युनर कार आणि मालवाहू टेम्पोची भीषण धडक झाली. या अपघातात एकाचा जागीच मृत्यू झाला असून, एक जण गंभीर जखमी झाला आहे. फॉर्च्युनरमधील अन्य तिघे जण सुखरूप बचावले.

पुण्याहून मुंबईच्या दिशेने भरधाव वेगाने जाणाऱ्या फॉर्च्युनर (एमएच 14 एमजी 0007) ने मुंबईकडे भाजीपाला वाहतूक करणाऱ्या मालवाहू टेम्पोला (एमएच 01 सीआर 7075) जोरदार धडक दिली. मिसिंग लिंक बोगद्यातील सुमारे सात किलोमीटर अंतरावर हा अपघात झाला.

प्राथमिक माहितीनुसार, फॉर्च्युनरमधील पाचही जण पिंपरी-चिंचवडमधील वाकड येथील भूमकर चौक परिसरातील रहिवासी आहेत. अपघाताची तीव्रता मोठी असल्याने एकाचा जागीच मृत्यू झाला, तर एक जण गंभीर जखमी झाला. अपघाताची माहिती मिळताच महामार्ग पोलीस, आयआरबीचे देवदूत पथक तसेच मदत यंत्रणांनी घटनास्थळी धाव घेतली. अपघातग्रस्त वाहनांमध्ये अडकलेल्या व्यक्तींना बाहेर काढून जखमीला तातडीने उपचारासाठी रुग्णालयात दाखल करण्यात आले. दरम्यान, अपघातामुळे मुंबईच्या दिशेने जाणारी वाहतूक सुमारे दोन तास बंद ठेवण्यात आली होती. वाहतूक कोंडी टाळण्यासाठी सर्व वाहने जुन्या मुंबईपुणे मार्गावरून मुंबईच्या दिशेने वळविण्यात आली. अपघातग्रस्त दोन्ही वाहने हटविल्यानंतर वाहतूक पुन्हा सुरळीत करण्यात आली. या अपघाताचा पुढील तपास महामार्ग पोलीस करीत आहेत.