पंढरपूर पोलिसांकडून चोरीच्या मोटारसायकली जप्त
। पंढरपूर । प्रतिनिधी ।
पंढरपूरसह सोलापूर आणि पुणे जिल्ह्यात दुचाकी चोरून नागरिकांची आणि पोलिसांची झोप उडवून धुमाकूळ घालणार्‍या टोळीचा पर्दाफाश करण्यात पंढरपूर पोलिसांना यश आले आहे.चार दुचाकीचोरांकडून तब्बल 14 लाख 40 हजार रुपये किंमतीच्या 29 मोटारसायकली जप्त करण्यात आल्या आहेत.त्यामुळे पंढरपूर शहर पोलिसांनी केलेली गेल्या काही वर्षातील मोठी कामगिरी समजली जात आहे.
पंढरपूर शहरातील मोटारसायकल चोरीतील गुन्ह्याचा तपास करीत असताना,गुन्हे शाखेचे अधिकारी आणि कर्मचारी यांना अकोले बुद्रुक येथील महेश नवले या इसमावर दुचाकी चोरत असल्याबाबत संशय आल्याने त्याच्यावर पाळत ठेवण्यात आली.यावेळी पोलिसांना नवले आणि त्याचा साथीदार चोरी केलेली मोटर सायकल घेऊन शहरातील एसटी बस स्टँड परिसरात विक्री करण्यास येणार असल्याबाबत पक्की माहिती मिळाली.त्याआधारे सापळा रचून पोलिसांनी संशयित म्हणून दोघांना ताब्यात घेतले.त्यावेळी त्यांच्याकडे सदरच्या मोटरसायकलीबाबत चौकशी केली असता,सदरची मोटरसायकल इंदापूर येथून चोरून आणल्याचे निष्पन्न झाले. याबाबत अधिक चौकशी केली असता त्यांनी सदरचा गुन्हा केल्याचे सांगितले. नवले आणि त्याचा परिते येथील साथीदार अमर मुसळे यांची कसून चौकशी करण्यात आली.या चौकशीत आणखी मोठी माहिती पोलिसांच्या हाती आली.
पंढरपूर शहर , इंदापूर , नातेपुते, वालचंद नगर ,यवत, कोथरूड, कुर्डूवाडी, माळशिरस , बंडगार्डन, खडक , बारामती, भोसरी, आणि सांगली या ठिकाणाहून मोटरसायकली चोरी केल्याचे सांगितले.महेश नवले याच्याकडून 8 तर, संजय मुसळे यांच्याकडून 11 मोटारसायकली जप्त करण्यात आल्या.अशा प्रकारे चोरीस गेलेल्या 29 मोटरसायकली जप्त करण्यात गुन्हे प्रकटीकरण शाखेच्या पोलीस कर्मचार्यांना यश आले आहे.या सर्व मोटरसायकली पंढरपूर शहर पोलीस ठाण्यात आणण्यात आल्या असून, या गुन्ह्यातील सदर आरोपींविरोधात चोरीचा गुन्हा दाखल करण्यात आला आहे.महेश कांतीलाल नवले (वय 21) रा.अकोले (बु), ता. माढा, सिद्धार्थ उर्फ अमर संजय मुसळे (वय 23) रा. परिते ता. माढा, सदाशिव महादेव फडतरे (वय 28) रा. तुंगत ता. पंढरपूर तसेच सोमनाथ उर्फ दादा दिलीप वाघमारे (वय 22) रा. कंदर ता. करमाळा या चार जणांवर गुन्हे दाखल करण्यात आले आहेत.
सदरची कामगिरी पोलीस अधीक्षक तेजस्वी सातपुते, अप्पर पोलीस अधीक्षक अतुल झेंडे,विक्रम कदम, अरुण पवार यांच्या मार्गदर्शनाखाली,राजेंद्र मगदूम, शरद कदम, बिपिनचंद्र ढेरे,सुरज हेंबाडे,राजेश गोसावी,इरफान मुलांणी,इरफान शेख,शोएब पठाण,महेश पवार, संजय गुटाळ,सुनील बनसोडे, सुजित जाधव,पो.कॉ. समाधान माने, विनोद पाटील, अर्जुन केवळे , अन्वर दातार यांनी केली असून ,सदर गुन्ह्याचा पुढील तपास पो.ना. सुनिल बनसोडे आणि महेश पवार हे करीत आहेत.
