ठेकेदाराच्या ढिसाळ कारभाराचा फटका
| मुरुड-जंजिरा | वार्ताहर |
तालुक्यातील खोरा बंदरावर कोट्यवधी रुपये खर्च करुन वाहनांसाठी पार्किंग उभारले आहे. मात्र नवीन जेटीचे काम सुरु असल्याने त्यातील अर्ध्या पार्किंगचा वापर ठेकेदार करत आहे. त्यामुळे ऐन दिवाळीच्या हंगामात आलेल्या पर्यटकांना त्यांची वाहने रस्त्याच्या बाजूला अथवा समुद्रात उभी करावी लागत आहे. स्थानिक प्रशासन आणि ठेकेदाराच्या ढिसाळ कारभाराचा फटका मात्र पर्यटकांसह स्थानिकांना बसत आहे.
दिवाळीच्या सुट्टीत मुरुड जंजिरा आणि पद्मदुर्ग किल्ला पाहण्यासाठी लाखो पर्यटक हजेरी लावतात. जंजिरा किल्ल्यात जाण्यासाठी 3 ठिकाणाहून जल वाहतूक होते. त्यामध्ये राजपुरी जेटी, खोरा जेटी आणि दिघी जेटीचा समावेश आहे. सर्व ठिकाणी मेरीटाइमबोर्डने कोटी रुपये खर्चून अधिकृत पार्किंग बनवले आहे. त्यातील राजपुरी व दिघी येथील पार्कींग पर्यटकांसाठी खुले करण्यात आले आहे. परंतु सर्वात जास्त पर्यटक असणाऱ्या खोरा जेटीतील पार्किंग सुरु नसल्याने पर्यटकांचे खूप हाल होत आहेत. शनिवारी खोरा जेटीत रस्त्याच्या दोंन्ही बाजूने वाहनांची पार्किंग केल्याने पर्यटकांना वाहने काढताना हाल होत असल्याचे दिसून आले. त्यामध्ये वाहन चालकांमध्ये भांडणे झाल्याचेही दिसून आले.
खोरा जेटीत पर्यटकांसाठी नूतन जेटी बनत आहे. ते काम सुरू असल्याने पार्कींगचा अर्धा भाग जेटीच्या कामासाठी बंद केला आहे, परंतु अर्ध्या भागात देखील 100 वाहने पार्कींग होऊ शकतात. शासकीय अडचणी बाजूला ठेऊन पर्यटकांसाठी दिवाळीसाठी तात्पुरते पार्किंग खुले करावे, अशी मागणी होत आहे.
खोरा जेटीत 2019 साली मेरीटाईम बोर्डाने 1 कोटी खर्च करून 400 वाहने पार्किंग होतीलअसे भव्य पार्किंग बनवले आहे. 2020 च्या सुरुवातीला काम पूर्ण झाले, परंतु आज 4 वर्ष झाली तरी पार्कींगमध्ये एक गाडी पार्क झालेली नाही. 4 वर्षात पार्कींगमधून शासनला लाखो रुपयांचे उत्पन्न मिळाले असते, परंतु शासनाच्या हलगर्जीपणामुळे मेरीटाईम बोर्डाकडून पार्कींगसाठी निविदा झालीच नाही. पार्किंगचा वापर पूर्ण क्षमतेने होत नसल्याने खराब होण्याची शक्यता नाकारता येणार नाही.
जंजिरा किल्ल्यात जाण्यासाठी खोरा जेटी हे सगळ्यात जवळचे ठिकाण असल्याने पर्यटक खोरा जेटीवरून किल्ल्यात जाण्यासाठी येतात. त्यामुळे शनिवारी पर्यटकांच्या गाड्यांची मोठ्या प्रमाणात गर्दी झाली होती. खोरा जेटीवर बोटीत बसताना पर्यटकांना कडक उन्हात उभे राहावे लागते. या ठिकाणी शेड उभारण्यात यावी, अशी मागणी पर्यटकांकडून करण्यात येत आहे.