पीएनपी होली चाईल्डचे ‘अजिंक्य’ यश

। अलिबाग । प्रतिनिधी ।

अलिबाग तालुक्यातील वेश्‍वी येथील पीएनपी होली चाईल्ड सी.बी.एस.ई. शाळेच्या विद्यार्थ्यांनी सोमवारी (दि.23) झालेल्या जिल्हास्तरीय बॉक्सिंग स्पर्धेत अजिंक्यपद जिंकून अभिमानास्पद कामगिरी करून दाखवली आहे. इयत्ता नववीतील विद्यार्थी अथर्व मोरे याने 17 वर्षांखालील 75 ते 80 किलो वजनी गटात अजिंक्यपद मिळवले आहे. या स्पर्धा जिल्हा क्रीडा कार्यालयाच्या सहयोगाने रसायनीतील पिल्लई एच.ओ.सी.एल. शैक्षणिक संकुलात आयोजित करण्यात आल्या होती. अजिंक्यपद मिळवणार्‍या अथर्वची विभागीय स्पर्धेसाठी निवड करण्यात आली आहे. तसेच, इयत्ता नववीतील झीशान झेंडेकर याने 55 ते 60 किलो वजनी गटात दुसरे स्थान मिळवत उपविजेतेपद प्राप्त केले आहे.

यावेळी सी.बी.एस.ई. होली चाइल्ड शाळेच्या मुख्याध्यापिका वेल्लईमल मुरुगन यांनी शाळेच्या यशाबद्दल सांगताना, शाळेची खेळ आणि शैक्षणिक क्षेत्रातील उत्कृष्ट कामगिरी ही संस्थेच्या कार्यवाह चित्रलेखा नृपाल पाटील यांच्या मोलाच्या मार्गदर्शनाचा परिणाम असल्याचे भाष्य केले. तसेच, पीएनपी संस्थेच्या कार्यवाह चित्रलेखा पाटील यांनी मुख्याध्यापिका वेल्लईमल मुरुगन, उपमुख्याध्यापिका सदाफ शाहबाजकर, क्रीडा शिक्षक आदित्य यादव व विद्यार्थ्यांचे अभिनंदन केले.