। नवीन पनवेल । वार्ताहर ।
पनवेल पालिका क्षेत्रातील मुंबई महानगर प्रदेश विकास प्राधिकरणाच्या (एमएमआरडीए) विकास योजनेतील रस्त्यांना जोडण्यासाठी महापालिकेने जोडरस्ते निर्माण करण्याचा निर्णय घेतला आहे. त्यामुळे महापालिका क्षेत्रातील वाहतूक व दळणवळण जलदगतीने होणार आहे. त्यासाठीचे भूसंपादन लवकरच करण्यात येणार आहे. तालुक्यातील 11 गावांचा एमएमआरडीएमध्ये समावेश होता. ऑक्टोबर 2016 महापालिकेची स्थापना झाल्यानंतर एमएमआरडीए विकास योजनेतील ही गावे मनपामध्ये समाविष्ट करण्यात आली. त्यामुळे बाजूच्या गावांमध्ये या योजनेनुसार मूलभूत पायाभूत सुविधा दिल्या गेल्या आहेत. तसेच एमएमआरडीएने रस्तेसुद्धा तयार केले आहेत.
हरकती, सूचनांसाठी 30 दिवसांची मुदत
संबंधित रस्त्यांची आखणी करणे, ते अंतिम करणे, जागांचे हस्तांतरण, विकास हक्क देऊन जमीन संपादन करण्याचे अधिकार प्राधिकृत अधिकारी म्हणून महापालिका आयुक्तांना महासभेने दिले आहेत. रस्त्यांचे रेखांकन जाहीर करण्यात आले असून याबाबतचा नकाशा पनवेल महापालिकेतील सहाय्यक नगर संचालकांच्या कार्यालयात ठेवण्यात आला आहे. तसेच 30 दिवसांच्या आत रस्त्यांच्या आखणीबाबत हरकती आणि सूचना महापालिकेकडे द्याव्या लागणार आहेत.
वाहतुकीसाठी जोडरस्ते सोयीस्कर
बीड आडवली गावाच्या हद्दीपर्यंत एमएमआरडीएची योजना आहे. स्वप्नपूर्ती गृहप्रकल्पाच्या काही अंतरावरून रोहिंजण गावापर्यंत जाणार आहे. तसेच खारघर व तळोजा गावामधूनही एक रस्ता जोडला जाणार आहे. या रस्त्यामुळे आडवली, धानसर, धरणागाव, धरणाकॅम्प रोहिंजण, पिसार्वे या गावांचा विकास होणार आहे. तसेच दळणवळण आणि वाहतुकीच्या दृष्टिकोनातून जोड रस्त्यांची आवश्यकता असल्याने पनवेल महापालिकेने हे पाऊल उचलले आहे.