समाजकल्याण सभापती दिलीप भोईर करणार नेतृत्व
। अलिबाग । विशेष प्रतिनिधी ।
सरकारकडून आर्थिक पिळवणूक होत असल्याने स्वेच्छा मरणाची परवानगी मिळावी अशी मागणी अलिबाग एस.टी. बस आगारातील कर्मचार्यांनी राज्याचे राज्यपाल आणि मुख्यमंत्री यांच्याकडे केल्यानंतर आता मंगळवार दि. 28 डिसेंबर रोजी समाजकल्याण सभापती दिलीप भोईर यांच्या नेतृत्वाखाली जिल्हाधिकारी कार्यालयावर जिल्ह्यातील एसटी कर्मचार्यांतर्फे मोर्चाचे आयोजन करण्यात आले आहे.
अलिबाग एस.टी. आगारातील कर्मचार्यांनी तहसीलदारांमार्फत राज्याचे राज्यपाल, मुख्यमंत्री यांना निवेदन दिले आहे. या निवेदनात कर्मचार्यांनी म्हटले आहे की, एस. टी. महामंडळातील सध्यस्थिती कर्मचारी यांची मानसिक स्थिती योग्य राहिलेली नाही व आम्ही सतत तणावपूर्वक स्थितीत काम करत आहोत. महाराष्ट्रातील इतर शासकीय कर्मचारी यांच्या तुलनेत एस. टी. कर्मचारी यांची आर्थिक स्थिती अत्यंत वाईट आहे. एस. टी. महामंडळातील आम्हाला मिळणारे तुटपुंजे वेतन तसेच इतर प्रकारे होणार्या मानसिक त्रासामुळे आमच्या काही एस. टी. कर्मचार्यांनी आत्महत्या केलेल्या आहेत. आमच्याही मनामध्ये आत्महत्या करण्यासारखे विचार येतात परंतु आत्महत्या करणे हा कायद्याने गुन्हा असल्याने आत्महत्या करु शकत नाही. वारंवार निवेदने देऊनही योग्य प्रतिसाद मिळत नसल्याने आम्ही स्वेच्छा मरणाची परवानगी मागत आहेत. ही स्वेच्छा मरणाची परवानगी आम्ही स्वत: कुठल्याही दबावात न घेता करीत आहे. कारण आम्ही आता या मानसिक व सरकारकडून होणार्या आर्थिक पिळवणुकीला वैतागलो आहोत. या मागणीकरिता आमच्यावर कुणीही दबाव टाकीत नसून स्वेच्छेने सही करीत आहे. महाराष्ट्र राज्याचे प्रमुख या नात्याने आपण एस. टी. महामंडळाला राज्य शासनात विलीन करुन राज्य सरकारी कर्मचार्यांप्रमाणे सेवा ज्येष्ठतेनुसार पदनिहाय वेतन श्रेणी देण्यात येवून आम्हाला आर्थिक व मानसिक त्रासातून मुक्त करावे व आम्हा एस. टी. कर्मचार्यांना जीवनदान द्यावे अन्यथा आम्हाला स्वेच्छा मरणाची परवानगी द्यावी. निवेदनावर अलिबाग आगारातील वाहतूक परीक्षक दिलीप पालवणकर, वाहतूक नियंत्रक प्रसन्नकुमार पाटील, सचिन मगर, धनश्री घरत आदींसह बहुतांश कर्मचार्यांच्या स्वाक्षर्या आहेत.
दरम्यान, मंगळवारी (28 डिसेंबर) सकाळी दहा वाजता येथील जिल्हाधिकारी कार्यालयावर जिल्ह्यातील एसटी कर्मचार्यांच्या मोर्चाचे आयोजन करण्यात आले आहे. जिल्हा परिषदेचे समाजकल्याण समिती सभापती दिलीप भोईर यांच्या नेतृत्वाखाली या मोर्चाचे आयोजन करण्यात आले असल्याची माहिती वाहतूक परीक्षक दिलीप पालवणकर यांनी दिली.