गुणवत्ता व्यवस्थापन यंत्रणा कार्यान्वित

। ठाणे । प्रतिनिधी ।

ठाणे शहराला एका बाजूला खाडी आणि दुसरीकडे संजय गांधी राष्ट्रीय उद्यान यांची साथ लाभली असल्याने इतर कोणत्याही शहराच्या तुलनेत ठाण्यातली हवा चांगली असते. मात्र, ही हवा सर्वकाळात उत्तम रहावी, यासाठी ‘हवा गुणवत्ता व्यवस्थापन यंत्रणा’ या नवीन ऑनलाइन साधनाचा नक्कीच उपयोग होईल, असे ठाणे महानगरपालिकेचे आयुक्त सौरभ राव यांनी सांगितले आहे.

ठाणे महानगरपालिकेसाठी कौन्सिल ऑन एनर्जी एन्व्हायरमेंट अँड वॉटर (सीईईडब्ल्यू) आणि युएसएड यांनी संयुक्तपणे ही ऑनलाइन यंत्रणा विकसित केली आहे. या यंत्रणेचे उद्घाटन नुकतेच करण्यात आले. ऑनलाइन प्लॅटफॉर्मवर मिळणार्‍या माहितीचा उपयोग नागरिकांनाही व्हावा, यासाठी लवकरच त्याची एक लिंक ठाणे महानगरपालिकेच्या वेबसाईटवर देण्यात येणार असल्याचे आयुक्त राव यांनी जाहीर केले आहे. हवेचे प्रदूषण रोखण्यासाठी, वेगवेगळ्या शहरात अस्तित्वात असलेल्या वेगवेगळ्या परिस्थितीनुसार उपाययोजना करण्याची गरज असते. हवेचे प्रदूषण आणि वातावरण बदल यांचा अन्योन्य संबंध आहे. हे लक्षात घेऊन स्थानिक स्वराज्य संस्थांसाठी ‘क्लीन एअर आणि बेटर हेल्थ’ या प्रकल्पांतर्गत ठाणे महापालिकेसाठी ‘हवा गुणवत्ता व्यवस्थापन यंत्रणा’ तयार करण्यात आली आहे. या यंत्रणेमुळे ठाणे महापालिकेला हवा प्रदूषणाशी सामना करण्यासाठी योग्य अशी माहिती मिळेल. त्यातून उपाययोजना करता येतील. राज्यात अशाप्रकारे प्रथमच ही यंत्रणा सुरू होत आहे, असे प्रतिपादन ‘यूएसएड इंडिया’ या संस्थेचे उपसंचालक वर्गीस पॉल यांनी केले.