रायगड, नाशिक, वायएमसीए संघांचा विजय

| रायगड | क्रीडा प्रतिनिधी |

रायगड जिल्ह्यात सध्या सुरू असलेल्या महाराष्ट्र क्रिकेट असोसिएशनच्या पुरुषांच्या दोन दिवसीय क्रिकेट स्पर्धेतील साखळी फेरीच्या झालेल्या सामन्यात रायगड जिल्हा क्रिकेट असोसिएशन,नाशिक जिल्हा क्रिकेट असोसिएशन व वायएमसीए क्रिकेट क्लब पुणे संघानी विजय मिळवला आहे. रायगड विरुद्ध सेंट्रल झोन या संघामध्ये झालेल्या सामन्यात रायगडच्या संघाने सेंट्रल झोन संघाचा एक डाव व 60 धावांनी दणदणीत विजय मिळवला आहे. प्रथम फलंदाजी करतांना सेंट्रल झोनच्या संघाने पहिल्या डावात सर्व गडी बाद 106 धावा काढल्या. रायगडचा अभिषेक खातू यांनी 8 फलंदाजांना बाद करत तंबूत धाडले. रायगडच्या संघाने पहिल्या डावात 9 गडी गमावत 312 धावांवर डाव घोषीत केला. रायगडचा कर्णधार रवी सोलंकी यांनी 51 तर श्रेयस कुमार यांनी 41 धावांची दमदार खेळी केली. पहिल्या डावात रायगडच्या संघाने 206 धावांची मोठी आघाडी घेतली. दुसऱ्या डावात सेंट्रल झोन संघाचा डाव 146 धावांमध्ये आटोपला, कौस्तुभ म्हात्रे यांनी 4 आर्यन देशमुख 3 तर अभिषेक खातू यांनी 2 फलंदाज बाद केले. रायगडच्या सामना एक डाव व 60 धावांनी जिंकला. गव्हाण उलवे झालेल्या सामन्यात नाशिक जिल्हा क्रिकेट असोसिएशनच्या संघाने सेंट्रल डिफेन्स अकॅडमी पुणे संघावर एक डाव व 75 धावांनी दणदणीत विजय मिळवला आहे. प्रथम फलंदाजी करतांना सीडीएच्या संघाने पहिल्या डावात सर्व गडी गमावत 191 धावा केल्या, नाशिक संघाने पहिल्या डावात धावांचा डोंगर उभा करत 6 गडी गमावत 428 धावा काढल्या त्यामध्ये रवींद्र मॅचा यांनी 140 तर अभिजितने मधल्या फळीत खेळतांना सर्वाधिक 140 धावा काढून शतक झळकवले. दुसऱ्या डावात सीडीएचा संघ 162 धावांमध्ये आटोपला. वायएमसीएच्या संघाने प्रथम फलंदाजी करतांना सर्व गडी बाद 285 धावा केल्या त्यामध्ये नित्या लुनकड यांनी सर्वाधिक 128 धावा काढून शतक झळकवले आहे. क्लब ऑफ महाराष्ट्राकडून केदार बजाज यांनी 4 गडी बाद केले. जिल्हा क्रिकेट असोसिएशनचे अध्यक्ष अनिरुद्ध पाटील यांच्या सर्व पदाधिकाऱ्यांनी उत्तम खेळाचे प्रदर्शन केल्या बद्दल शुभेच्छा दिल्या आहेत.