रायगडच्या मुलांची नेत्रदीपक कामगिरी

| नागोठणे | प्रतिनिधी |

राज्यस्तरीय पिंच्याक सिलाट स्पर्धा 15 ते 17 ऑगस्ट दरम्यान कोपरखैरणे येथील क्रिस्ट अकॅडमी येथे पार पडल्या. या स्पर्धेत रायगडच्या खेळाडूंनी 12 पदके जिंकत राज्यात आपली छाप पाडली आहे. या स्पर्धेत राज्यभरातून सुमारे 350 खेळाडूंनी सहभाग नोंदवला होता.

पिंच्याक सिलाट हा इंडोनेशियन मार्शल आर्टचा खेळ असून हा टँडिंग (फाईट), तुंगल (सिंगल इव्हेंट), रेगु (ग्रुप इव्हेंट), गंडा (डेमो फाईट), सोलो (क्रीएटीव्हिटी) या पाच प्रकारामध्ये खेळला जातो. या स्पर्धेत खेळताना रायगडच्या खेळाडूंनी 5 सुवर्णपदके आपल्या नावावर केली आहेत. त्यामध्ये टँडिंगमध्ये सुबोर्ण चक्रवर्ती, अर्णव रावकर, स्पृहा विचारे, पियुष साळुंके व नेहा दोरे या खेळाडूंनी सुवर्णपदक जिंकले आहे. त्यांची कर्नाटक येथे होणाऱ्या राष्ट्रीय स्पर्धेसाठी महाराष्ट्र संघात निवड झाली आहे. तसेच, संकल्प चक्रवर्ती, रियांशी सिंह, शर्वरी खोपकर, प्रांजल खरपूडे, प्रीत माळी व अनिश पालकर यांनी सोलो इव्हेंट व टँडिंगमध्ये रौप्यपदक जिंकून रायगडच्या शिरपेचात मनाचा तुरा रोवला आहे. यावेळी रायगडच्या संघासोबतच सम्यक गायकवाड याने संघ प्रशिक्षक म्हणून आपली निवड सार्थ ठरवली आहे. सर्व खेळाडू हे रायगड जिल्हा पिंच्याक सिलाट संघटनेचे सचिव धनंजय जगताप यांच्या मार्गदर्शनाखाली सराव करत असून सर्व खेळाडूंचे संघटनेचे अध्यक्ष रुपेश जाधव यांनी अभिनंदन केले आहे.