पोषण माह अभियानात रायगड जिल्ह्याची उल्लेखनीय कामगिरी

| अलिबाग | प्रतिनिधी |
गेल्या चार वर्षापासून राबविण्यात येणाऱ्या पोषण माह अभियानात रायगड जिल्ह्याने नेहमीच उल्लेखनीय कामगिरी बजावली असून, जिल्हा नेहमीच राज्यात पहिल्या तीन क्रमांकांमध्ये राहिला आहे, असे गौरवोद्गार राज्याच्या महिला व बालविकास मंत्री आदिती तटकरे यांनी शुक्रवारी अलिबागमध्ये आयोजित कार्यक्रमात काढले.

महिला व बालविकास विभागामार्फत राबविण्यात येणाऱ्या विविध योजना, तसेच उपक्रमांची माहिती उपस्थितांना दिली. यावेळी रायगड जिल्हा परिषदेच्या माध्यमातून पोषणविषयक विविध पदार्थ, पालेभाज्यांच्या स्टॉलचे प्रदर्शन व विविध सांस्कृतिक कार्यक्रमांचे आयोजन करण्यात आले होते.

महाराष्ट्र राज्य महिला व बालविकास विभाग व रायगड जिल्हा परिषद यांच्या संयुक्त विद्यमाने अलिबाग येथील होरायझन हॉल येथे शुक्रवारी राज्यस्तरीय पोषण माह सांगता समारोह कार्यक्रमाचे आयोजन करण्यात आले होते. यावेळी तटकरे यांनी उपस्थितांना मार्गदर्शन केले.

रायगड जिल्ह्यात पोषण माह अभियानात राबविण्यात आलेल्या उपक्रमांचे त्यांनी कौतुक केले. याचे श्रेय प्रशासनासोबत अंगणवाडी सेविका व मदतनीस यांचे आहे. यापुढील कालावधीत जिल्हा प्रथम क्रमांकावर राहील, असे काम करू असा विश्वास व्यक्त केला. तसेच आदिती तटकरे यांनी महिला व बालविकास विभागाकडून राबविण्यात येणाऱ्या डॉ. आनंदीबाई जोशी आरोग्य शिबीर, नवरात्रीनिमित्त नऊरंग पोषणाचे या उपक्रमांची माहिती देत, अंगणवाडी सेविका व मदतनीस यांना सरकारकडून दिवाळीत देण्यात येणारी भाऊबीज भेट दिवाळीपूर्वी देण्याची घोषणा केली.

यावेळी अंगणवाडी उपायुक्त विजय क्षीरसागर, पोषण माह उपायुक्त आनंद खंडागळे,जिल्हा परिषदेचे मुख्य कार्यकारी अधिकारी डॉ. भरत बास्टेवाड, अतिरिक्त मुख्य कार्यकारी अधिकारी सत्यजित बडे, जिल्हा परिषद मुख्य वित्त लेखा अधिकारी राहुल कदम, महिला व बालविकास उपमुख्य कार्यकारी अधिकारी निर्मला कुचिक यांच्यासह जिल्हा परिषद विविध विभागांचे अधिकारी, कर्मचारी, अंगणवाडी सेविका, मदतनीस उपस्थित होते.

या कार्यक्रमात उत्कृष्ट कार्य करणाऱ्या अंगणवाडी सेविका, मदतनीस, पर्यवेक्षिका, सुदृढ बालके, पोषण आहार अभियानात उत्कृष्ट काम केलेले प्रकल्प यांचा सत्कार करण्यात आला. तसेच माझी कन्या भाग्यश्री, आर्थिक सहाय्य योजनेतील लाभार्थ्यांना योजनेचा लाभ देण्यात आला.

महिनाभरात विविध विभागांच्या समन्वयाने पोषण माह अभियान राबविण्यात आले आहे. पोषण व आरोग्यविषयक एक चळवळ सुरू व्हावी हे पोषण माह अभियानाचे उद्दिष्ट आहे. या अभियानात महिनाभरात राज्यात 7 कोटी 75 लाख उपक्रम राबविण्यात आले आहेत. हे अभियान 2018 रोजी सुरू झाले असून, 2018 ते 2020 या वर्षांमध्ये राज्याने तिसरा क्रमांक पटकाविला. तर 2020 व 2021 मध्ये राज्याने प्रथम क्रमांक पटकाविला आहे. तर यावर्षी राज्य अभियानात दुसऱ्या क्रमांकावर राहिले आहे, अशी माहिती पोषण माह अभियानाचे उपयुक्त विजय क्षीरसागर यांनी दिली.