गतिरोधक नसल्यामुळे नागरिकांच्या जिवाला धोका
| गोवे-कोलाड | वार्ताहर |
सुधागड तालुक्यातील पाली हे तालुक्याचे ठिकाण असून, पाली ही नगरपंचायत झाल्यानंतर दिवसेंदिवस पालीचा विकास होताना दिसत आहे. पाली बाजारपेठेतील रस्ते अनेक वर्षांपासून निकृष्ट दर्जाचे होते, परंतु या बाजारपेठेतील रस्ते दोन महिन्यांपूर्वी सुसाट बनवले आहेत. यामुळे या बाजारपेठेतून टूव्हीलर, थ्रीव्हीलर, फोरव्हीलर आदी वाहने रस्त्याला गतिरोधक नसल्यमुळे सुसाट वेगाने जात आहेत. त्यामुळे या मार्गावरून प्रवास करणार्‍या नागरिकांच्या जिवाला धोका निर्माण झाला आहे.
पाली येथे बल्लालेश्‍वराच्या दर्शनासाठी असंख्य भाविक ये-जा करीत असतात, तसेच येथे शाळा, कॉलेज असल्याने असंख्य विद्यार्थी, दूध विक्रेते, बाजारपेठेत येणारे असंख्य नागरिक येथूनच ये-जा करीत असतात. यामुळे वेगात जाणार्‍या वाहनांमुळे मोठा अपघात होऊ शकतो. यामुळे नागरिकांच्या जिवाला धोका निर्माण झाला असून, सुसाट जाणार्‍या वाहनांचे वेग कमी करण्यासाठी बाजारपेठेच्या चौका-चौकात रस्त्याला गतिरोधक बसविण्यात यावे, अशी मागणी येथील व्यापारी अंकित ओसवाल यांनी केली आहे.
