गीतेंच्या विजयासाठी कोंडजाई देवीला साकडे

। पाली । प्रतिनिधी ।

शिवसेना ठाकरे गटाकडून माजी खासदार अनंत गीते यांना रायगड लोकसभेची उमेदवारी देण्यात आली आहे. गीतेंना निवडून आणण्यासाठी पदाधिकारी व कार्यकर्त्यांनी कंबर कसली असून बुधवारी (दि. 20) सुधागड तालुक्यातील युवासेनेच्या वतीने नागशेत येथील ठाकरे घराण्याची कुलदैवत कोंडजाई देवीला नारळ वाढवण्यात आले.

युवासेना माजी जिल्हाप्रमुख सचिन डोबले, युवासेना उपजिल्हा अधिकारी प्रवीण पाटील, विधानसभा अधिकारी किरण पिंपळे, युवा सेना सुधागड तालुकाप्रमुख नंदेश पालांडे यांनी तसेच उपस्थित युवा सैनिकांना कोंडजाई देवीला निवडणुकीतील विजयासाठी साकडे घातले तसेच अनंत गीते भरघोस मतांनी निवडून आल्यानंतर त्यांच्या हस्ते देवीची खणा-नारळाने ओटी भरू व या विभागाचा व देवस्थानाचा विकास करू, असे बोलून कोंडजाई देवीचा जयजयकार केला.

गीते यांच्या प्रचारार्थ युवासंपर्क अभियान, गाव भेटी कार्यक्रम सुधागड तालुक्यातही राबवण्यात येत आहे. याप्रसंगी युवासेना नांदगाव विभागाच्या अध्यक्षपदी मयूर जाधव, उपविभाग अध्यक्षपदी नीतेश कोळी, पिंपळोली शाखेच्या प्रमुखपदी संगम कोळी यांची नियुक्ती करण्यात आली आहे.