आंतरराष्ट्रीय स्पर्धेसाठी जय्यत तयारी
| इस्लामपूर | वृत्तसंस्था |
बाकू (अझरबैझान) मधील वर्ल्ड चॅम्पियनशिप स्पर्धेत 50 मीटर पिस्तूल शूटिंग स्पर्धा प्रकारात सुवर्णपदक पटकावलेल्या साखराळे (ता. वाळवा) येथील साक्षी सूर्यवंशीची ‘बुलेट’ सध्या सुसाट आहे. आंतरराष्ट्रीय स्पर्धेसाठी तिची तयारी सुरू असून, आता त्या दिशेने तिचा प्रवास सुरू आहे. 50 मीटर पिस्तूल शूटिंग स्पर्धा प्रकारात साक्षीने टियाना (हरयाना) आणि करणदीप कौर (पंजाब) या सहकाऱ्यांच्या सोबतीने भारताला सुवर्णपदक मिळवून दिले होते. या यशाने सांगली जिल्ह्याचे नाव आंतरराष्ट्रीयस्तरावर चमकले आणि वाळवा तालुक्याच्या लौकिकातही भर पडली. जेमतेम आर्थिक परिस्थिती असलेल्या मेहनती साक्षीने परिस्थितीवर मात करत आणि अनेकांच्या मदतीने आज नेत्रदीपक यश कमावले आहे, पण त्यावर ती समाधानी नाही. तिला आंतरराष्ट्रीय पातळीवर आपल्या देशासाठी अव्वल कामगिरी करायची आहे. त्यासाठी तिची तयारी सुरू आहे.
अझरबैझान देशाची राजधानी बाकू येथे 51 देशांच्या सहभागातून झालेल्या आंतरराष्ट्रीय स्पर्धेतील तिच्या यशानंतर तिला चांगल्या संधी चालून येत आहेत. साक्षी अत्यंत जिद्दी आणि मेहनती आहे. इस्लामपूर येथील यशवंतराव चव्हाण महाविद्यालयात बीसीए विभागाची ती विद्यार्थिनी आहे. सध्या कोल्हापुरात तिचा रोज आठ-दहा तासांचा सलग सराव सुरू आहे. तिच्या यशामुळे तिला रेल्वेमध्ये नोकरी मिळाली, चर्चगेट मुंबई येथील मुख्य कार्यालयात ती रुजू झाली आहे, परंतु त्याही पुढच्या पदांसाठी ती पात्र आहे. केवळ ती पदवीधर नसल्याने त्या पदांपासून ती दूर आहे. अन्यथा शासकीय कोट्यातून मिळणाऱ्या अनेक मोठ्या पदांच्या संधी तिला चालून येत आहेत. सध्या स्पर्धेच्या तयारीसाठी तिला सुट्टी मिळाली असून, कोल्हापूर येथे ती सध्या प्रशिक्षक जितेंद्र विभूते यांच्याकडे ती प्रशिक्षण घेत आहे.
आंतरराष्ट्रीय पातळीवर ऑलिंपिक स्पर्धेत सहभागी होऊन भारताचे नाव उज्ज्वल करायचे ध्येय आहे. 10 मीटर, 25 मीटर आणि 50 मीटर पिस्तूल शूटिंगचा नित्यनेमाने सराव सुरू आहे. आजपर्यंतच्या माझ्या प्रवासात अनेकांनी साथ दिली, त्या सर्वांचा विश्वास सार्थ ठरवायचा आहे.
साक्षी अनिल सूर्यवंशी