ज्येष्ठ नागरिक उद्बोधन शिबीर

| श्रीवर्धन | प्रतिनिधी |
ज्येष्ठ नागरिकांच्या विविध समस्यांचे निराकरण करण्यासाठी ज्येष्ठ नागरिक कायद्याची निर्मिती करण्यात आली. समाजाच्या सर्व स्तरांत कायदेविषयक जनजागृती होणे काळाची गरज आहे. असे उदगार श्रीवर्धन न्यायालयाच्या न्यायाधिश सोनाली जवळगेकर यांनी काढले. उच्च न्यायालयाच्या निर्देशांनुसार श्रीवर्धन तालुका न्यायालयात ज्येष्ठ नागरिक उद्बोधन शिबीराचे आयोजन करण्यात आले होते. त्यावेळी त्या बोलत होत्या. या कार्यक्रमास वकील सर्वश्री परशुराम घोसाळकर, आशिष वढावकर, राजेश वावेकर, संतोष सापते, आनंद अपराध तसेच आलोक श्रीवर्धनकर, कोकण विभागीय ज्येष्ठ नागरिक महासंघाचे उपाध्यक्ष आनंद जोशी, श्रीवर्धन ज्येष्ठ नागरिक संघाचे अध्यक्ष नरेश पुलेकर, दिलीप हेंद्रे, दिव्यांग संघटनेचे तालुकाध्यक्ष निलेश नाक्ती व अन्य ज्येष्ठ नागरिक उपस्थित होते.

यावेळी ज्येष्ठ विधिज्ञ परशुराम घोसाळकर यांनी ज्येष्ठ नागरिक कायदा व सर्वसामान्य व्यक्ती या विषयावर सविस्तर मार्गदर्शन केले. कार्यक्रमात जवळगेकर या मार्गदर्शन करतांना पुढे म्हणाल्या की ज्येष्ठ नागरिकांच्या विविध समस्यांचे निराकरण करण्यासाठी ज्येष्ठ नागरिक कायद्याची निर्मिती करण्यात आली. समाजाच्या सर्व स्तरापर्यंत कायद्याची जनजागृती होणे गरजेचे आहे. ज्येष्ठ नागरिकांच्या अडीअडचणी न्यायालयापर्यंत आल्यास त्याचे तात्काळ निराकरण होऊ शकते.ज्येष्ठ नागरिक संघाने ज्येष्ठ नागरिकांच्या मदतीसाठी प्रयत्नशील असावे. या कार्यक्रमात विधी सेवा समितीसोबत सहाय्य करणा-या निलेश नाक्ती व अन्य सदस्यांचा न्या.जवळगेकर यांचे हस्ते प्रमाणपत्र देऊन सन्मान करण्यात आला. अ‍ॅड.सापते यांनी सूत्रसंचालन केले.