100 आंतरराष्ट्रीय टी-20 खेळणारी तरुण खेळाडू
| डरबन | वृत्तसंस्था |
भारतीय महिला क्रिकेट संघाची स्फोटक फलंदाज शेफाली वर्माने आंतरराष्ट्रीय क्रिकेटमध्ये एक नवा इतिहास रचला आहे. अवघ्या 15 व्या वर्षी पदार्पण करणाऱ्या शेफालीने आता वयाच्या 22 व्या वर्षी 100 आंतरराष्ट्रीय टी-20 सामने खेळणारी सर्वात तरुण भारतीय खेळाडू होण्याचा मान मिळवला आहे. आपल्या आक्रमक फलंदाजीने प्रतिस्पर्धी गोलंदाजांच्या मनात धडकी भरवणारी शेफाली आता भारतीय क्रिकेटचा खऱ्या अर्थाने भविष्यकाळ म्हणून उदयाला आली आहे.
रविवारी (19 एप्रिल) दक्षिण आफ्रिकेविरुद्धच्या पाच सामन्यांच्या टी-20 मालिकेतील दुसऱ्या सामन्यात मैदानात उतरताच शेफालीने हा भीमपराक्रम केला. वयाची 22 वर्षे आणि 81 दिवस पूर्ण असताना तिने हा टप्पा गाठला आहे. यासह तिने आपली सहकारी खेळाडू जेमिमा रॉड्रिग्स हिचा विक्रम मोडीत काढला आहे. जेमिमाच्या नावावर 2024 च्या महिला आशिया चषकादरम्यान23 वर्षे आणि 327 दिवस वय असताना 100 टी-20 सामने खेळण्याचा विक्रम होता. जागतिक स्तरावर विचार केला तर, 100 सामने खेळणारी शेफाली ही जगातील तिसरी सर्वात तरुण खेळाडू ठरली आहे. तिच्यापुढे केवळ रवांडाच्या गिसेले इशिमवे आणि हेन्रिएट इशिमवे यांची नावे आहेत. भारताकडून 100 आंतरराष्ट्रीय टी-20 सामने खेळणाऱ्या महिला खेळाडूंच्या विशेष क्लबमध्ये आता शेफालीचे नाव सुवर्ण अक्षरात कोरले गेले आहे. याआधी कर्णधार हरमनप्रीत कौर, स्मृती मंधाना, दीप्ती शर्मा आणि जेमिमा रॉड्रिग्स यांनी हा पल्ला ओलांडला असून शेफाली आता या दिग्गज खेळाडूंच्या रांगेत जाऊन बसली आहे.
हरियाणाच्या रोहतकची कन्या असलेल्या शेफालीने 2019 मध्ये अवघ्या 15 वर्षे 239 दिवस वय असताना आंतरराष्ट्रीय क्रिकेटमध्ये पाऊल ठेवले होते. सुरुवातीपासूनच आपल्या निडर आणि आक्रमक शैलीमुळे तिने सर्वांचे लक्ष वेधून घेतले. 2019 च्या महिला टी-20 चॅलेंजमध्ये मिताली राजच्या नेतृत्वाखालील व्हेलॉसिटी संघाकडून खेळताना तिने दिग्गज गोलंदाजांची पिसं काढली होती. तेव्हापासून शेफालीने मागे वळून पाहिले नाही.