भरधाव टेम्पो ट्रॅव्हलर दरीत कोसळला

। रत्नागिरी । प्रतिनिधी ।

भरधाव वेगात असलेल्या एका टेम्पो ट्रॅव्हलर्सवरील चालकाचा ताबा सुटल्याने दापोलीकडे जाणारी टेम्पो ट्रॅव्हलर रस्ता सोडून थेट खोल दरीत कोसळली. ही घटना चाचवळ गावाच्या हद्दीत सोमवारी (दि. 13) रात्री साडे आठ वाजण्याच्या सुमारास घडली आहे. या टेम्पो ट्रॅव्हलस मधून पर्यटनासाठी आलेले 12 प्रवासी सुदैवाने बचावले.

मिळालेल्या माहितीनुसार, मुंबई- बोरवली येथून दापोली येथे पर्यटनासाठी टेम्पो ट्रॅव्हलरमधून येणाऱ्या पर्यटकांच्या टेम्पो ट्रॅव्हलरवरील वाहन चालकाचा ताबा सुटल्याने वाहन चाचवळ हद्दीत एका वळणावर थेट दरीत कोसळून अपघात झाला. हा अपघात रात्रीच्या वेळी झाल्याने आणि दाट अंधार सगळीकडे असल्याने पर्यटनासाठी आलेले पर्यटक संकटात सापडले होते. त्यातील अनेकांनी आरडाओरडा केल्याने या मार्गावरुन जाणारे काही जण थांबले आणि त्यांनी टेम्पो ट्रॅव्हलरमध्ये अडकलेल्यांना सुखरूप बाहेर काढले. या अपघातात चालकाला किरकोळ दुखापत झाली असून, ट्रॅव्हलरमधील 12 पर्यटक प्रवासी सुदैवाने बचावले आहेत.