। सिंधुदुर्ग । वृत्तसंस्था ।
मालवण एसटी आगारातून सुटलेल्या मालवणकट्टा सिंधुदुर्गनगरी या बसफेरीवर अज्ञात व्यक्तींनी दगडफेक केल्याची घटना आनंदव्हाळ येथील मुख्य रस्त्यावर घडली आहे. या घटनेमुळे परिसरात खळबळ उडाली आहे.
राज्य परिवहन महामंडळाचे राज्यशासनात विलीनीकरण या प्रमुख मागणीसाठी राज्यात गेल्या दीड महिन्यांपासून कर्मचार्यांचा संप सुरू आहे. सिंधुदुर्गातही गेले 35 दिवस एसटी संपामुळे लालपरी थांबली होती. पण नुकताच येथील आगारातील तीन कर्मचार्यांनी संपातून माघार घेतल्याने मालवण ओरोस मार्गावर पहिली एसटी बसफेरी सोडण्यात आली.
याच पार्श्वभूमीवर मालवण आगारातून चालक अजित भोगवेकर व वाहक आंबोजकर हे मालवण कट्टा सिंधुदुर्गनगरी ही एसटी बसफेरी घेऊन निघाले. बसमध्ये ओरोस येथे शासकीय कार्यालयातील तेरा कर्मचारी होते. बसफेरी आनंदव्हाळ येथे आली असता अज्ञातांनी दगडफेक केल्याची घटना घडली.
दोघा अज्ञातांनी चालकाच्या बाजूने असलेल्या काचेवर दगडफेक केली. यानंतर ते अज्ञात तेथून पळून गेले. सुदैवाने यात कोणीही जखमी झाले नाही. या घटनेची माहिती एसटीच्या कर्मचार्यांनी आगारातील अधिकार्यांना दिली. यानुसार आगारप्रमुख सचेतन बोवलेकर, अमोल कामते यांच्यासह अन्य अधिकार्यांनी घटनास्थळी भेट देत पाहणी करत माहिती घेतली. या घटनेमुळे प्रवाशांचे हाल झाले.
या घटनेमुळे कामबंद आंदोलनातून माघार घेत कामावर रुजू होणार्या कर्मचार्यांच्या जीवितास धोका निर्माण झाल्याचे चित्र आहे. या घटनेची गंभीर दखल एसटी प्रशासनाने घेतली असून, अज्ञाताविरोधात येथील पोलिस ठाण्यात तक्रार देण्यात आली आहे. अधिक तपास पोलीस करत आहेत.