एसटीचे चाक डिझेल घोटाळ्यात…

रायगडातील एसटीचा चक्काजाम होण्याची भीती
अलिबाग | भारत रांजणकर |

एसटीच्या रायगड विभागीय कार्यालयांमध्ये डिझेल करिता ठेवलेले दीड कोटी रुपये आदेश नसतानाही शेकडो कर्मचाऱ्यांच्या पगाराकरीता वापरल्याची धक्कादायक घटना पेण येथे घडली आहे.

याबाबत सविस्तर माहिती अशी की, एसटीचे रायगड विभागीय कार्यालय पेण येथे असून या कार्यालयातील अकाउंट डिपार्टमेंटने एसटीला रोज लागणाऱ्या डिझेल करिता ठेवलेले सुमारे दीड कोटी रुपये कोणत्याही प्रकारचे प्रशासकीय आदेश नसताना शेकडो कामगारांच्या पगारासाठी वापरून घोळ घातला आहे. आपली झालेली चूक लक्षात येताच लेखा विभागातील कर्मचारी वरिष्ठ अधिकाऱ्यांची एकच धावपळ झाली. एसटीच्या विभागीय नियंत्रक अनघा बारटक्के यांनी संबंधित बँकांशी संपर्क साधून सदरची रक्कम रोखण्याचा प्रयत्न केला. या प्रयत्नात त्या काही अंशी  यशस्वीही ठरल्या. परंतु दरम्यान अनेक एसटी कर्मचाऱ्यांनी सदरचे पैसे पगाराचे असल्याचे समजून काढले होते.

एसटीला लागणारे डिझेलकरिता ठेवलेला निधी कर्मचाऱ्यांच्या पगारा करीता वापरल्याने रायगडातील एसटीचा चक्काजाम होण्याची भिती व्यक्त करण्यात येत आहे. कारण कोणती डिझेल कंपनी एसटीला डिझेल उधारीत देत नाही. त्यामुळे त्याचे पैसे त्वरित अदा करावे लागतात. सदरची रक्कम इतर ठिकाणी वापरल्याने चक्काजाम होण्याची भीती व्यक्त करण्यात येत आहे.

एसटीच्या रायगड विभागीय कार्यालयात लेखाधकारी म्हणून कार्यरत असलेले राजेंद्र परदेशी यांची या प्रकरणात अंतिम जवाबदारी असते. राजेंद्र परदेशी हे पुणे येथे राहत असून आठवड्यातून केवळ एक ते दोन दिवस ते कामावर येतात. उर्वरित चार दिवस मात्र कामावर येत नाहीत असा आरोप कर्मचाऱ्यांनी केला. कामावर आल्यावर ते एसटीच्या रेस्ट हाऊस मध्ये राहतात व घाईगडबडीने कामे उरकून पुन्हा घरी निघून जातात. या घाईगडबडीने कामे उरकण्यामुळेच हा दीड कोटी रुपयांचा आर्थिक घोळ झाला असल्याची चर्चा एसटी कर्मचाऱ्यांमध्ये सुरू आहे. त्यामुळे एसटी प्रशासनाने रायगड विभागीय कार्यालयात बायोमेट्रिक अटेंडन्स स्कॅनर लावण्याची मागणी करण्यात येत आहे. या प्रकरणाची सखोल चौकशी करून संबंधित दोषींवर कारवाई करण्यात येईल अशी माहिती रायगड विभागीय नियंत्रक आनघा बारटक्के यांनी दिली.