उरणमध्ये लहानग्यांचं भवितव्य धुरात!

अल्पवयीन मुलं गांजा-ड्रग्जच्या आहारी; पालक, पोलीस आणि यंत्रणा झोपेत?

| उरण | प्रतिनिधी |

वीर सावरकर मैदान, एनआय हायस्कूलसमोरील ग्राऊंड, पिरवाडीचा समुद्रकाठ, फुंडे रेल्वे कॉलनी आणि भिवंडीवाला गार्डनसारखी ठिकाणं, पानटपरीच्या आडून सर्रास अंमली पदार्थांचा सौदा सुरू आहे. आणि या सौद्याचे ‌‘ग्राहक’ म्हणजे 14 ते 25 वयोगटातील अल्पवयीन विद्यार्थी आणि बेरोजगार युवक आज नशेच्या आहारी जाऊन बिनधास्त फिरताना दिसत आहेत. आई-वडिलांची बेफिकिरी, पोलीस प्रशासनाचा ढिसाळपणा आणि शिक्षण संस्थांची ठरवून घेतलेली तटस्थता या सगळ्यांचा स्फोटक परिणाम म्हणजे उरणमधील नशेखोरीची ही अघोषित साथ, असे चित्र उरणमध्ये दिसत आहे.

विडी-सिगरेटपासून सुरू झालेली व्यसनांची वाट आता थेट गांजा, चरस, कोकेन, हिरॉईन, थिनर, लोडेक्स बाम, व्हाइटनर, पेनकिलर, कफ सिरप इथवर पोहोचली आहे. यामुळे शाळा-कॉलेजांकडे पाठ फिरवलेली मुलं दिवसाढवळ्या नशेच्या दुनियेत रमलेली दिसतात. सर्वात गंभीर बाब म्हणजे, हे सगळं पालकांना माहीत असूनही ते बदनामीच्या भीतीनं तोंड उघडायला तयार नाहीत. पोलीसही गप्प बसले आहेत, असे बोलले जात आहे.

पोलीस प्रशासनाने आता तरी झोपेचं सोंग सोडावं, या अड्ड्यांवर छापे टाकावेत, ड्रग्ज विकणाऱ्या टोळ्यांचा बंदोबस्त करावा आणि शाळा-कोलेजांमध्ये व्यसनमुक्ती मोहीम सुरू करावी. नाहीतर एक दिवस हीच मुले समाजाचा चेहरा काळवंडवतील, असे सुज्ञ उरणकरांकडून सांगण्यात येत आहे. उरणमध्ये सोनू, पटेल, शहा नावाचे मोठे दलाल उरणमध्ये कार्यरत आहेत. तसेच तालुक्यातील व शहरातील बहुतांश पान टपरीवर नशीली पदार्थांची खुलेआमपणे विक्री केली जात आहे. याची माहिती शासकीय यंत्रणेला नसल्याबद्दल आश्चर्य व्यक्त केले जात आहे.