सार्वजनिक बांधकाम मंत्री कोंडीत सापडले
रविंद्र चव्हाणांचा पाहणी दौराच रद्द; रखडलेल्या चौपदरीकरणाचा फटका
खारपाडा ते पेण वाहनांच्या रांगा
| रायगड | प्रतिनिधी |
महामार्गाचे रखडलेल्या चौपदरीकरणाचा फटका दस्तुरखुर्द सार्वजनिक बांधकाम मंत्र्यांनाच बसला आहे. शनिवारी महामार्गाच्या पाहणीसाठी निघालेले मंत्री रवींद्र चव्हाण पळस्पे येथून खारपाडा येथे पोहचले आणि त्यांच्या वाहनाचा ताफा वाहतूक कोंडीत सापडला. वाहनांची वर्दळ इतकी होती की, त्यांना आपल्या वाहनांचा ताफा वळवून माघारी किंवा समोरील वाहतूक थांबवून पुढे देखील जाणे शक्य झाले नाही.
खारपाडा ते पेणपर्यंत वाहनांच्या दुतर्फा रांगा लागल्याने प्रवास करणाऱ्यांची चांगलीच कोंडी झाली होती. पंधरा दिवसांवर गणेशोत्सव येऊन ठेपला आहे. या कालावधीत चाकरमान्यांचा प्रवास सुखकर होईल का. असा सवाल या वाहतूक कोंडीनंतर कोकणवासीय विचारत आहेत.
हामार्गाच्या एका मार्गिकेचे काम पूर्णत्वास नेण्यासाठी चव्हाण वारंवार काँक्रिटीकरणाच्या कामाची पाहणी करीत आहेत. गणेशोत्सवापूर्वी एका मार्गिका काँक्रिटीकरण करण्याचा शब्द त्यांनी दिला आहे. यामुळे आतापर्यंत चव्हाण यांनी अनेकदा महामार्गावर जाऊन प्रत्यक्ष पाहणी केली आहे. शनिवारी सकाळी ते महामार्ग चौपदरीकरणाच्या कामाची पाहणी करण्यासाठी पळस्पे येथून निघाले.
पळस्पे ते खारपाडापर्यंत येत असताना महामार्गावर उतरून त्यांनी पाहणी केली. जिते गावानजीक आल्यानंतर सुरु असलेल्या काँक्रिटीकरणाच्या कामामुळे महामार्गावरील वाहतूक एका मार्गिकेवरून वळविण्यात आली होती. यामुळे वाहतूक कोंडी निर्माण झाली. या वाहतूक कोंडीत सार्वजनिक बांधकाम मंत्री रवींद्र चव्हाण आणि त्यांच्या सोबत असलेला लवाजमा देखील वाहतूक कोंडीमध्ये सापडला.
सरकारच्या नावाने शिमगा
पेण- खारपाडा दरम्यान एक मार्गिकेमधून दुतर्फा वाहतूक वळविण्यात आली होती. सकाळी साडेसात वाजल्यापासून वाहतूक कोंडी होण्यास सुरुवात झाली. महामार्गावर एक एसटी बंद पडली , एका ठिकाणी कंटेनर आडवा झाला. यामुळे वाहतुकीवर परिणाम झाला. दुपारी एक वाजेपर्यंत पेण शहरापासून खारपाडा पुलापर्यंत वाहतूक ठप्प होती. दोन्हीकडील वाहतूक कोंडी झाल्याने कंपन्यांमध्ये जाणाऱ्या कामगारांच्या बस आणि एसटीने प्रवास करणारे कर्मचारी वाहतूक कोंडीमध्ये अडकले होते. दुचाकीस्वारांना देखील दुचाकी चालविण्यासाठी देखील महामार्गावर जागा मिळत नव्हती. वाहतूक कोंडीत सापडल्याने अनेक प्रवाशांनी सरकारच्या नावाने शिमगा केला होता.
On 7th June 1937, Krushival was started as a weekly magazine and the masses got their platform. In the Raigad district, many new movements were launched to fight against injustice and exploitation upon the underprivileged and the hard-working common people.