रायगडच्या खेळाडूंची चमकदार कामगिरी

| कोर्लई | प्रतिनिधी |

मुंबई येथे संपन्न झालेल्या राज्यस्तरीय कराटे स्पर्धेत ओकिनावा शोरीन रियु कराटे डो व उडेन टी कोबुजूत्सु असोसिएशन रायगडच्या कराटेपट्टूंनी 2 सुवर्ण, 4 रजत व 7 कांस्यपदके मिळवून चमकदार कामगिरी केली आहे.

ओम समर्थ भारत व्यायाम मंदिर आणि महाराष्ट्र अम्यॅचुअर स्पोर्ट्स कराटे असोसिएशन यांच्या संयुक्त विद्यमाने मुंबईतील दादर येथे राज्यस्तरीय कराटे स्पर्धेचे आयोजन करण्यात आले होते. त्यात राज्यभरातील अनेक कराटे संघटनांनी भाग घेतला होता. या स्पर्धेत रायगड जिल्ह्यातील रसायनी व मजगाव-नांदगाव येथील शोरीन रियु कराटे डोच्या कराटेपट्टूंनी एकूण 13 पदकांची कमाई केली आहे. त्यात रसायनी येथील शर्वरी तांबडकर व वैदेही कुलकर्णी यांनी सुवर्णपदक पटकाले आहे.तसेच, शांभवी सावंत, आरंभ गणतांडेल, त्रिशा गट्टू व खूशी शेट्ये यांनी रजतपदक पटकावले आहे. तर, ईश्वरी तांबडकर, स्वरूप जांभळे, अंश गहिरे, काव्या नाक्ती, आर्यन गद्रे, जय ठाकूर व अब्दुल कापसे हे कांस्यपदकाचे मानकरी ठरले आहेत. या सर्व कराटेपट्टूंना आंतरराष्ट्रीय पंच क्योशी विजय तांबडकर यांच्या अध्यक्षतेखाली प्रशिक्षक रेन्शी अभिषेक तांबडकर, सेन्सई आकांक्षा तांबडकर व सेंम्पाय स्वप्ना तांबडकर यांचे मार्गदर्शन लाभले.