डाव्या तीरावरील प्रकल्प अर्धवट स्थितीत

। चिपळूण । वृत्तसंस्था ।
कोयना धरणाच्या डाव्या तीरावर उदंचन स्वरूपाचा वीज प्रकल्प अर्धवट स्थितीत 2015 पासून रखडलेला आहे. या प्रकल्पाला चालना दिल्यास कोयनेच्या वीजनिर्मितीच्या क्षमतेत 80 मेगावॉटची भर पडेल, तसेच भारनियमनातून काहीसा दिलासा मिळू शकेल कोयना धरणाची सध्याची वीजनिर्मितीची क्षमता 2020 मेगावॉट इतकी आहे. प्रकल्पाच्या एकूण क्षमतेत आणखी 80 मेगावॉटची भर झाल्यास कोयनेची एकूण वीजनिर्मितीची क्षमता 2100 मेगावॉट इतकी होईल. कोयना धरणातून शेतीसाठी सोडण्यात येणार्‍या पाण्यापैकी 5500 क्युसेक पाण्याचा वापर या प्रकल्पात होणार आहे. धरणापासून एक किलोमीटर अंतरावर सिंगल लेकटॅप घेण्यात येणार होते. प्रकल्पाचा एकूण खर्च सुमारे एक हजार कोटीचा होता. त्यात साडेचारशे कोटींचे टर्बाइन बसवले जाणार होते.

राज्यात पहिल्यांदाच कोयना प्रकल्पावर जर्मन बनावटीच्या डेरियाजटर्बाइनचा वापर होणार होता. हे टर्बाइन एकाचवेळी पाणीउपसा आणि वीजनिर्मिती करू शकते. त्यासाठी रासाटी येथे बंधारा बांधण्यात येणार असून, साठवलेले पाणी वीजनिर्मिती करून पुन्हा धरणात सोडण्याची योजना तयार करण्यात आली. कोयना बांधकाम प्रकल्प विभागाला डाव्या तीराचे काम देण्यात आले होते; मात्र स्थानिकांचे प्रश्‍न, कंत्राटदाराच्या कामात निर्माण झालेले अडथळे यामुळे 2015 पासून हे काम पूर्णपणे ठप्प आहे.

आता या प्रकल्पाची किंमत वाढली आहे. कोयना प्रकल्पातून वर्षाला साडेतीनशे कोटी मेगावॅट वीजनिर्मिती होते. त्यातून महानिर्मिती कंपनीला 1200 कोटींचे वार्षिक उत्पन्न मिळते. त्यामुळे या एकाच विद्युतगृहाच्या किफायतशीरपणाचा विचार न करता, कोयना प्रकल्पातून एकूण उत्पन्न होणारी वीज आणि तिचा एकत्रित येणारा दर याचा विचार केल्यास ती दोन रुपये प्रति युनिटपेक्षा कमी दरात मिळते आहे. महाजनकोने हे विचारात घेऊन या प्रकल्पाला चालना दिली तरच या प्रकल्पाचे काम पुन्हा सुरू होऊ शकते. या प्रकल्पाला चालना मिळाल्यास महाराष्ट्राच्या वीजनिर्मितीमध्ये भर पडेल.