मुरूड-जंजिरा नगरपरिषद निवडणुकीसाठी आरक्षणाची तारीख ठरली

। आगरदांडा । प्रतिनिधी ।
नगरपरिषदेच्या सन 2022 मध्ये होणार्‍या सार्वत्रिक निवडणूकीसाठी आरक्षणाची तारीख अखेर ठरली असून 28 जुलै रोजी सायंकाळी 4 वाजता ही आरक्षण सोडत होणार आहे. नागरिकांचा मागासवर्ग प्रवर्ग, नागरिकांचा मागासवर्ग प्रवर्ग (महिला) व सर्वसाधारण (महिला) आरक्षण निश्‍चित करण्यात येणार आहे.

सुप्रीम कोर्टाने बाठिंया आयोगाचा अहवाल मान्य केला असून या अहवालानुसार निवडणुका घेण्याचे निर्देश कोर्टाने राज्य निवडणूक आयोगाला दिल्याने निवडणूक आयोगाने आता निवडणूक प्रक्रिया पुन्हा सुरू केली आहे. निवडणूक आयोगाच्या सूचनेनुसार जिल्हाधिकार्‍यांनी मुरुड-जंजिरा नगरपरिषदेच्या लोकनियुक्त सदस्य पदांसाठी आरक्षण सोडत 28 जुलै रोजी मुरुड-जंजिरा नगरपरिषद कार्यालयामधील कै.नानासाहेब धर्माधिकारी सभागृहात होणार आहे. तर नागरिकांच्या माहितीसाठी व हरकती तसेच सूचना मागविण्याकरिता 29 जुलै रोजी या आरक्षण सोडतीची प्रसिद्धी करण्यात येणार आहे.

दरम्यान आरक्षण व सोडतीच्या अनुषंगाने हरकती व सूचना असल्यास नागरिकांनी सोमवार 1 ऑगस्टपर्यंत सकाळी 10 ते सायंकाळी 6 वाजेपर्यंत नगरपरिषद मुख्याधिकारी पंकज भुसे यांच्याकडे सादर करणे आवश्यक आहे. विहित कालावधीनंतर प्राप्त होणार्‍या हरकती व सूचनांचा विचार केला जाणार नाही, असे निवडणूक आयोगाकडून स्पष्ट करण्यात आले आहे.