रायगडाची पवित्रता धुळीस?

शिवसमाधीस्थळी प्रि-वेडिंग शूटचा व्हिडिओ व्हायरल; संतप्त शिवप्रेमींचा उद्रेक

| महाड | प्रतिनिधी |

महाराष्ट्राच्या अस्मितेचा किल्ला मानल्या जाणाऱ्या रायगड किल्ल्यावरील वरील पवित्र शिवसमाधी परिसरात प्रि-वेडिंग शूट केल्याचा व्हिडिओ समोर आल्यानंतर राज्यभर संतापाची लाट उसळली आहे. श्रद्धास्थानाचा अवमान झाल्याची भावना व्यक्त करत शिवप्रेमींनी तीव्र निषेध नोंदवला असून, दोषींवर तात्काळ कठोर कारवाईची मागणी जोर धरत आहे.

इतिहास, स्वाभिमान आणि श्रद्धेचे प्रतीक असलेल्या रायगड किल्ल्यावर पुन्हा एकदा वादंग निर्माण झाला आहे. शिवसमाधी परिसरात एका जोडप्याने प्रि-वेडिंग शूट केल्याचा व्हिडिओ सोशल मीडियावर व्हायरल होताच वातावरण तापले आहे. व्हिडिओमध्ये संबंधित जोडपे समाधी परिसरात चित्रिकरण करताना स्पष्ट दिसत आहे. या प्रकारामुळे छत्रपती शिवाजी महाराजांच्या यांच्या पवित्र स्मृतींना धक्का बसल्याची भावना व्यक्त होत आहे. “हे केवळ शूट नाही, तर महाराष्ट्राच्या अस्मितेचा अपमान आहे,” अशा तीव्र शब्दांत नागरिकांनी संताप व्यक्त केला आहे.

या वादग्रस्त प्रकरणावर राज्याचे मंत्री भरत गोगावले यांनीही कठोर भूमिका घेतली आहे. “रायगडावर प्रि-वेडिंग किंवा अशा प्रकारचे कोणतेही शूटिंग अजिबात सहन केले जाणार नाही. ज्यांनी हे कृत्य केले त्यांनी तात्काळ माफी मागावी,” असा स्पष्ट इशारा त्यांनी दिला.तसेच, किल्ल्यावर तैनात असलेल्या सुरक्षा यंत्रणेकडून काही हलगर्जीपणा झाला असल्यास संबंधित सुरक्षा कर्मचाऱ्यांवर कारवाई करून बदल करण्यात येईल, असेही त्यांनी स्पष्ट केले.

दरम्यान, शिवप्रेमी आणि विविध संघटनांकडून रायगडावरील संवेदनशील भागांमध्ये अशा प्रकारच्या शूटिंगवर कायमस्वरूपी बंदी घालण्याची मागणी जोर धरत आहे. केंद्रिय पुरातत्त्व विभाग आणि स्थानिक प्रशासनाने या घटनेची गंभीर दखल घेऊन दोषींवर कठोर कारवाई करावी, तसेच भविष्यात अशा घटनांना आळा घालण्यासाठी स्पष्ट नियमावली तयार करावी, अशी मागणी पुढे येत आहे. सोशल मीडियावर “रायगडाची पवित्रता जपा” या हॅशटॅगखाली संतापाची लाट उसळली असून, हा व्हिडिओ खरा आहे का आणि संबंधितांनी शूटसाठी अधिकृत परवानगी घेतली होती का, याची चौकशी होण्याकडे सर्वांचे लक्ष लागले आहे.