रक्तदानातून शहिदांना वाहिली आदरांजली
| कर्जत | प्रतिनिधी |
26/11 रोजी मुंबईवर झालेल्या दहशतवादी हल्यात शहीद झालेल्या पोलीस अधिकारी आणि कर्मचारी यांच्या स्मरणार्थ कर्जतमध्ये रक्तदान शिबीर आयोजित करण्यात आले होते. 86 रक्तदात्यांनी रक्तदान करून शहिदांना आदरांजली वाहिली आहे. सार्वजनिक रक्तदाता राजाभाऊ कोठारी यांनी आयोजित केलेले कर्जत-खालापूर तालुक्यातील 463 वे रक्तदान शिबीर ठरले.
कर्जत पोलीस ठाणे आणि सार्वजनिक गणेशोत्सव मंडळ यांच्या संयुक्त विद्यमाने 26 /11 शहीद दिनाच्या निमित्ताने रक्तदान शिबिराचे आयोजन करण्यात आले होते. प्रारंभी शहिदांना श्रद्धांजली वाहण्यात आली. कर्जत पोलिस ठाण्याच्या सभागृहात आयोजित करण्यात आलेल्या रक्तदान शिबिराचे उद्घाटन कर्जत पोलीस ठाण्याचे पोलीस निरीक्षक के.डी. कोल्हे यांच्या हस्ते करण्यात आले. याप्रसंगी कर्जत पोलीस ठाण्याच्या सहाय्यक पोलीस निरीक्षक उद्धव सुर्वे, सार्वजनिक रक्तदाते राजाभाऊ कोठारी, सार्वजनिक गणेशोत्सव मंडळाचे अध्यक्ष आशिष गोखले आदी उपस्थित होते.
सार्वजनिक गणेशोत्सव मंडळाचे सदस्य अभिजित मराठे यांनी सर्वप्रथम रक्तदान करून रक्तदान शिबिराचा शुभारंभ केला. कल्याण येथील संकल्प ब्लड बँकेच्या डॉ. सोनाली देसाई, राजशेखर नायर, समृद्धी देसाई, पार्वती गायकवाड, पल्लवी खैरनार, अलका बगाडे, नम्रता बामुगडे, श्रद्धा ठाकूर, वर्षा माळी, सुदर्शन आरेकर यांनी रक्त संकलनाचे काम केले. याप्रसंगी मुकेश सुर्वे, भालचंद्र जोशी, सदानंद जोशी, अभिजीत मराठे, विवेक भागवत, जोशी, कल्पेश शहा, निलेश परदेशी, पंकज शहा, मिलिंद खंडागळे आदींनी सहकार्य केले.
या रक्तदान शिबीरात गणेश ठोसर यांनी आपल्या जीवनातील 112 वे तर सार्वजनिक रक्तदाता राजाभाऊ कोठारी यांनी 104 वे रक्तदान केले.
