मिस, मिसेस कृषीवल सौंदर्य स्पर्धेचे आयोजन
मराठी सिनेतारका सई ताम्हणकरची प्रमुख उपस्थिती
। अलिबाग । प्रतिनिधी ।
परखड भूमिका मांडणारे, कष्टकरी, शेतकरी, कामगार आणि अन्यायग्रस्तांच्या पाठीशी कायम उभे राहणारे सर्वांच्या हक्काचे, जिल्ह्यातील अग्रगण्या वृत्तपत्र दैनिक कृषीवलचा 88 वा वर्धापन दिन शुक्रवारी (दि.7) अलिबागमध्ये साजरा केला जाणार आहे. यानिमित्त अलिबागमध्ये भव्य फॅशन शो मिस कृषीवल, मिसेस कृषीवल सौंदर्य स्पर्धा आयोजित केली असून, या कार्यक्रमाची विशेष आकर्षण मराठी सिनेतारका सई ताम्हणकर ठरणार आहे.
शेकाप सरचिटणीस आ. जयंत पाटील यांच्या प्रमुख उपस्थितीत हा सोहळा साजरा केला जाणार आहे. यावेळी शेकाप महिला आघाडी प्रमुख चित्रलेखा पाटील, अलिबागचे माजी नगराध्यक्ष प्रशांत नाईक, माजी उपनगराध्यक्षा अ‍ॅड. मानसी म्हात्रे, सर्व माजी पदाधिकारी, सदस्य, वेगवेगळ्या विभागाचे अधिकारी आदी मान्यवर उपस्थित राहणार आहेत. अलिबाग तालुक्यातील कुरुळ येथील क्षात्रैक्य समाज हॉलमध्ये सायंकाळी साडेपाच वाजण्याच्या सुमारास कार्यक्रम सुरु होणार आहे. मुंबई, पुण्यासारख्या मोठ्या शहरांमध्ये ज्या पद्धतीने सौंदर्य स्पर्धा घेतल्या जातात, त्या धर्तीवर अलिबागमध्ये या सौंदर्य स्पर्धेचा आनंद उपस्थितांना घेता येणार आहे. जिल्ह्यातील नागरिक, कार्यकर्ते, वाचकांनी या कार्यक्रमाला उपस्थित राहावे, असे आवाहन कृषीवलच्या संपादक माधवी सावंत यांनी केले आहे.