माथेरानमध्ये पर्यटकांना वाहतूक कोंडीचा फटका

गैरसोयींमुळे पायी प्रवास

| नेरळ | प्रतिनिधी |

माथेरान पर्यटन स्थळी रविवारी हजारो पर्यटक आले होते. पर्यटकांना सायंकाळी परतीच्या प्रवासाच्या वेळी प्रचंड मनस्ताप सहन करावा लागला. घाटरस्त्यात वाहने अडकून पडल्याने पर्यटकांना चालत घाटरस्ता उतरावा लागला.

सर्व गैरसोयींमुळे पर्यटकांचे हाल होताना पाहायला मिळाले. वाहतूक कोंडीमुळे पोलीस प्रशासन देखील हतबल झाले होते. दरम्यान, शनिवार-रविवारी होणारी पर्यटकांची गर्दी लक्षात घेऊन प्रशासनाने नियोजन करायला हवे अशा सूचना सातत्याने होत आहे. माथेरानमध्ये पावसाळ्यात येणाऱ्या पर्यटकांची संख्या मोठी आहे. दररोज चार-पाच हजार पर्यटक येत असतात. संध्याकाळी धुके आणि पाऊस यांचा आनंद घेत असतात. तर शनिवार आणि रविवारी वर्षा सहलीचा आनंद घेण्यासाठी पर्यटकांचे तांडे माथेरानकडे पहाटेपासून सुरु होतात, त्यामुळे सकाळी नऊ वाजल्यापासून वाहतूक कोंडीला सुरुवात होते. पर्यटकांची वाहने आणि टॅक्सी गाड्यांच्या कोंडीमुळे पर्यटकांना वॉटर पाईप स्टेशनपर्यंत आपले सामान सोबत घेऊन पायी प्रवास करावा लागत होता. सायंकाळी पर्यटक दस्तुरी येथील वाहनतळावरुन परतीच्या प्रवासासाठी निघालेले पर्यटकांची टॅक्सी पकडण्यासाठी झालेली गर्दीमुळे वाहतूक कोंडी घाट रस्त्यात दिसून आली.

घाटात चांगभले मंदिराच्या खाली पर्यटकांनी टॅक्सी पकडण्यासाठी रांगा लावल्या होत्या. त्या पॉईंटपर्यंत 700 मीटर रस्ता चालत पर्यटकांना जावे लागत होते. तर तेथून देखील टॅक्सी सहज उपलब्ध होत नव्हती. त्यामुळे टॅक्सीसाठी लागलेल्या रांगा बघून पर्यटक चालतच पुढे घाटरस्ता उतारताना दिसत होते. पर्यटकांना पेब किल्ला पॉईंट आणि वॉटर पाईप येथे टॅक्सी मिळत होत्या. या वाहतूक कोंडीमुळे बंदोबस्त करण्यासाठी असलेले पोलीस देखील हतबल झालेले दिसून येत होते. दरम्यान या सर्वांचा फटका पर्यटकांना चागंलाच बसला.

पर्यटकांचे मेगा हाल
अभूतपूर्ण गर्दीमुळे मौजमजा करून निघालेले पर्यटक पायी चालून थकून गेल्याचे चित्र पाहयला मिळत होते. पर्यटकांना आपल्या चिमुकळ्यांसह पायी प्रवास करावा लागला होता.