धोकादायक जुना पूल पाडून नवीन पूल उभारण्याची मागणी
। नवीन पनवेल । वार्ताहर ।
पनवेलमधील ब्रिटिशांच्या काळात बांधण्यात आलेला वडघर-करंजाडे पूल पाच वर्षांपूर्वी वाहतुकीसाठी बंद करण्यात आला. त्यामुळे एका पुलावर वाहतुकीचा भार आला आहे. मोठ्या प्रमाणात वाहने एका पुलावरून ये-जा करत असल्याने वाहतूक कोंडीला सामोरे जावे लागते. धोकादायक व बंद असलेला जुना पूल पाडून त्याजागी नवीन पूल उभारण्याची मागणी करण्यात येत आहे.
उरण-पनवेल रस्ता रा.मा.क्र. 103 वरील कि.मी. 23/00 गाढी नदीवर ब्रिटिशकालीन पूल 1927 साली बांधण्यात आलेला आहे. या पुलाची लांबी 148 मीटर असून, त्यात 590 मीटरचे 25 गाळे आहेत. याठिकाणी बाजूला नवीन पुलाची बांधणीसुद्धा करण्यात आली. दुसरा पूल बांधल्यामुळे वाहतूक कोंडी कमी होण्यास मदत झाली होती. जुनाट झालेल्या या पुलावरून कित्येक वर्षांपासून वाहतूक सूरु होती. मात्र, महाड येथे घडलेल्या दुर्घटनेनंतर बांधकाम विभागाने त्यावेळेस 89 वर्षे जुना झालेल्या या पुलावरील वाहतूक बंद करण्याचा निर्णय ऑगस्ट 2016 मध्ये घेतला होता. 2016 पासून नवीन पुलावरूनच वाहतूक सुरू आहे. उरण, पनवेल परिसरात वाहनांची संख्या प्रचंड वाढलेली आहे. त्यातच रिक्षांची संख्यादेखील वाढत चालली आहे. परिणामी, एकाच पुलावरून वाहने ये-जा करत असल्याने मोठ्या प्रमाणात वाहतूक कोंडी होत आहे.
वडघर-करंजाडेच्या एका पुलावर वाहतुकीचा भार आल्याने वाहने चालवाताना वाहतूक कोंडीचा नित्याने सामना करावा लागतो. या पुलवार वाहतूक कोंडी नित्याची झालेली आहे. त्यामुळे धोकादायक व बंद असलेला जुना पूल पाडून नवीन पूल उभारण्याची मागणी नागरिकांतर्फे करण्यात येत आहे.
बंद असलेल्या वडघर-करंजाडे पुलाला वाहनतळाचे स्वरूपदेखील प्राप्त झाले आहे. चारचाकी गाड्या तसेच मोठमोठे टेम्पो, दुचाकी गाड्या या ठिकाणी दिवस-रात्र उभ्या करण्यात येत आहेत. तर, सुरु असलेल्या पुलावर हातगाड्या उभ्या असतात.