भोस्ते घाटात तिहेरी अपघात; आठ जण जखमी

| दापोली | प्रतिनिधी |

मुंबई – गोवा महामार्गावरील भोस्ते घाटात अपघाताचे सत्र कायम असून, सिमेंट बलगर ट्रक, इर्टीगा कार व अन्य एक ट्रक व दुचाकी अशा चार वाहनांमध्ये झालेल्या विचित्र अपघातात ट्रकमधील दोघे व कारमधील 6 जण गंभीर जखमी झाल्याची घटना रविवारी (दि.23) दुपारी 12 वाजण्याच्या सुमारास घडली आहे.

मिळालेल्या माहितीनुसार, संस्कृती कदम (42), जागृती शिंदे (35), शोभा कदम (60), संतोष कदम (51), मयुरी कदम (30), व जयराम सुर्वे (14) सर्व रा. मुंबई अशी कारमधील जखमी झालेल्या प्रवाशांची नावे आहेत. तर ट्रक चालक राज मंगळी (26), क्लिनर मल्लिकार्जुन काजी (32) अशी ट्रकमधील जखमी झालेल्यांची नावे आहेत. गोव्याहून मुंबईच्या दिशेने येणार्‍या सिमेंटच्या मोठ्या ट्रेलरने समोर चाललेल्या इर्टिगा कारला जोरदार धडक देऊन त्यानंतर भोस्ते घाटात नादुरुस्त झाल्याने महामार्गाच्या कडेला उभ्या असलेल्या ट्रकला धडक दिली. या अपघातात नादुरुस्त उभा ट्रक जवळपास 200 फूट खोल दरीत कोसळला. तसेच इर्टीगा गाडी ट्रेलरच्या धडकेने डिव्हायडर तोडून दुसर्‍या लेनमध्ये गेली. या दरम्यान समोरुन येणा-या दुचाकीला या मोटारींची धडक बसली. वरील दोन्ही वाहनांना धडक दिल्यानंतर सिमेंटचा ट्रेलर देखील दरीत कोसळण्याच्या स्थितीत जाऊन अडकला. ट्रेलर मधील चालक आणि वाहक असे दोन जण जखमी झाले. घटनास्थळी पोलिसांनी धाव घेत दोन्ही लेनवरील वाहतूक धिम्या गतीने सुरू केली. सर्व जखमींना रुग्णालयात उपचारासाठी दाखल करण्या साठी श्री स्वामी समर्थ रुग्णवाहिका, नरेंद्र महाराज रुग्णवाहिका व 108 रुग्णवाहिका यांनी मदत कार्य करत जखमींना कळंबणी उपजिल्हा रुग्णालयात दाखल करण्यात आले. या घटनेचा पुढील तपास पोलीस करीत आहेत.