अपघातात बारा वर्षीय मुलीचा मृत्यू

। पालघर । प्रतिनिधी ।

वसई पूर्वेच्या शीरसाड-अंबाडी मार्गावरील चांदीप येथे गणेशोत्सवासाठी कपडे खरेदी करून परतणार्‍या दुचाकीस्वाराला टेम्पोची धडक लागून अपघात घडला आहे. यात बारा वर्षीय मुलीचा जागीच मृत्यू झाला आहे. मानसी पाटील असे या मुलीचे नाव आहे. ही घटना गुरुवारी सायंकाळी साडेसहाच्या सुमारास घडली आहे.

मांडवी येथे राहणारे धनंजय पाटील आपल्या दुचाकीवरून दोन्ही मुलांना घेऊन उसगाव येथे कपडे खरेदीसाठी गेले होते. खरेदी करून घरी परतत असताना चांदीप जवळ पोहचताच भरधाव वेगाने येणार्‍या आयशर टेम्पोने दुचाकीला धडक दिल्याने अपघात घडला. या अपघातात धनंजय पाटील आणि त्यांची दोन्ही मुले दूरवर फेकली गेली. यावेळी मुलगी मानसी पाटील हिच्या डोक्यावरून गाडीचे चाक गेल्याने तिचा जागीच मृत्यू झाला. तर, मुलगा ओमकारला डोक्यात दुखापत झाली असून टेम्पोचालक पळून गेला आहे. याप्रकरणी मांडवी पोलीस ठाण्यात चालकाविरोधात गुन्हा दाखल केला आहे.