। पनवेल । वार्ताहर ।
अग्नीशस्त्राची विक्री करण्यास आलेल्या दोघा इसमांना कामोठे पोलिसांनी ताब्यात घेतल्याने मोठी घटना टळली आहे. कामोठे पोलीस ठाणे हद्दीत किया शोरुमजवळ, खांदा कॉलनी सिग्नल समोर, कामोठे, नवी मुंबई याठिकाणी अँक्टीव्हा स्कूटीवर 21 ते 22 वर्ष वयोगटातील दोन इसम पिस्तुल विक्रीसाठी येणार असल्याची गुप्त बातमीदारामार्फत माहिती वरिष्ठ पोलीस निरीक्षक स्मिता जाधव यांना प्राप्त झाल्याने त्यांनी कामोठे पोलीस ठाणेकडील पोउपनि कोठावळे, पोना कांबळे, पोशि चनेरलु व पोशि श्रीनामे व सोबत पंच असे पथकासह लागलीच नमुद ठिकाणी सापळा लावून संशयित आरोपी विश्‍वजीत गडदे (21 रा.कामोठे) व आझाद हुसेन मोहम्मद समीम (22 रा.सुकापूर) यांना ताब्यात घेवून त्यांची अंगझडती घेतली असता त्यांच्याकडे एक गावठी बनावटीचे अग्नीशस्त्र (पिस्तुल) व मोबाईल फोन तसेच रोख रक्कम सापडली आहे. त्यांना ताब्यात घेवून त्यांच्या विरुद्ध कामोठे पोलीस ठाण्यात तक्रार दाखल करण्यात आली आहे. सदर अग्नीशस्त्रे कोणाकडून आणली या संदर्भात कामोठे पोलीस अधिक शोध घेत आहेत.
अग्नीशस्त्राची विक्री करणार्‍या दोघांना अटक
