। अलिबाग । शहर प्रतिनिधी ।
शेतकरी कामगार पक्षाच्या माध्यमातून जिल्हा महिला आघाडी प्रमुख चित्रलेखा पाटील प्रयत्नाने गुरुवार दि. 16 सप्टेंबर रोजी वेश्वि, गोंधळपाडा, गवळीवाडी आणि वाडगावफाटा येथील 200 लाभार्थ्यांचे लसीकरण करण्यात आले. यावेळी नागरिकांनी चित्रलेखा पाटील यांचे आभार मानले.
शेतकरी कामगार पक्षाने दि. 1 ते 8 सप्टेंबर रोजी मोफत लसीकरण मोहिमेस सुरुवात केली. यावेळी शेकाप नेत्या चित्रलेखा पाटील यांनी अत्यंत चोख नियोजन करुन लसीकरणाचा पहिला टप्पा यशस्वीरित्या पार पाडला. याच पार्श्वभूमीवर बुधवारी (दि. 15) मोफत लसीकरणाचा दुसरा टप्पा सुरु झाला. शेकापतर्फे तोडकरी रुग्णालयात नागरिकांना मोफत लसीकरण करण्यात आले.
ऑफलाईन पद्धतीची असणारी ही लसीकरण मोहिम गावपातळीनुसार सुरु करण्यात आली होती. दुसर्या टप्प्याचेही योग्य नियोजन करण्यात आले आहे. कोरोना नियमांचे पालन करुन नागरिकांनी लस घेतली. या मोहिमे अंतर्गत रोज एक किंवा दोन गाव असे 200 लोकांना लस देण्यात येणार आहे. शुक्रवारी (दि.17) चौल , वरंडे येथील नागरिकांचे लसीकरण करण्यात येईल. यापुढे तिसर्या व चौथ्या टप्प्याचेही नियोजन करण्यात येणार असल्याचे चित्रलेखा पाटील यांनी सांगितले.